Vic Sotto at Vice Ganda tatapusin na ang noontime war, nagsama sa pelikulang “The Greatest Showdown”

By Anne Venancio

Isang malaking sorpresa ang naghihintay sa mga tagahanga ng pelikulang Pilipino matapos opisyal na ipakilala ang “The Greatest Showdown,” ang kauna-unahang pelikulang pagsasamahan ng Comedy King na si Vic Sotto at Unkabogable Star na si Vice Ganda.

Inanunsiyo ang inaabangang proyekto sa isang espesyal na mall event sa Gateway Mall 2 sa Araneta City, kung saan personal na humarap sa publiko ang dalawang comedy icons. Agad na naging usap-usapan ang kanilang pagtatambal dahil matagal nang hinihiling ng maraming fans na makita silang magkasama sa iisang pelikula.

Mas lalo pang pinasaya ang audience nang batiin ni Vic ang crowd gamit ang sikat na linyang, “Hi, madlang pipol,” habang si Vice naman ay sumagot ng, “What’s up, Dabarkads?” na nagdulot ng masiglang palakpakan mula sa mga dumalo.

Ayon kay Vice, aasahan ng lahat ang isang pelikulang puno ng katatawanan. Aniya, matapos nilang pareho na gumawa ng mas seryosong proyekto sa mga nakaraang taon, panahon na para magbigay sila ng puro saya at walang tigil na halakhakan sa mga manonood. Dagdag naman ni Vic, bukod sa comedy, may mahahalagang aral ding mapupulot ang audience sa kuwento.

Sa direksiyon ni Jun Robles Lana, tampok sa pelikula ang pagtutulungan ng ABS-CBN Studios, Star Cinema, Idea First, MZ Productions, at APT Entertainment. Bagama’t wala pang opisyal na kumpirmasyon, inaasahan ng marami na isa ito sa pinakamalalaking pelikula ngayong taon at posibleng mapabilang sa Metro Manila Film Festival.

Dahil sa makasaysayang collaboration na ito, marami ang naniniwalang isa itong bagong simula ng pagkakaisa sa entertainment industry at isang proyektong tiyak na magpapasaya sa buong pamilya.