GOITIA: Bagong Yugto ng Ugnayang Saudi Arabia at Pilipinas sa Ilalim ng Vision 2030

Ang ugnayan ng Saudi Arabia at Pilipinas ay matagal nang higit pa sa usapin ng paggawa at remittances. Isa itong relasyong hinubog ng tiwala, pagtutulungan, at ng ambag ng daan-daang libong Pilipino sa pag-unlad ng Kaharian.

Sa loob ng maraming dekada, naging mahalagang katuwang ang mga Pilipino sa kalusugan, inhinyeriya, edukasyon, konstruksyon, hospitality, at iba pang pangunahing industriya ng Saudi Arabia. Kasabay nito, ang kanilang sipag at dedikasyon ay nagbigay ng mas magandang kinabukasan sa hindi mabilang na pamilyang Pilipino. Ang matibay na ugnayang ito ang ngayon ay nagbubukas ng mas malawak na oportunidad para sa dalawang bansa.

Sa isang eksklusibong panayam sa Okaz, sinabi ni Dr. Jose Antonio Ejercito Goitia, Chairman at President ng JACCG Holdings, Inc., isang holding company na may portfolio ng mga negosyo sa iba’t ibang industriya, na panahon na upang lampasan ang tradisyunal na ugnayang nakasentro sa paggawa at remittances. Aniya, dapat itong palawakin tungo sa mas malalim na kooperasyon sa pamumuhunan, serbisyo, food security, enerhiya, at human capital development sa ilalim ng Saudi Vision 2030.

“Ang trabaho ang nagsilbing tulay upang mabuo ang tiwala ng ating dalawang bansa, ngunit ang tiwala ang tunay na pundasyon ng ugnayang ito. Ang nakikita natin ngayon ay ang paggamit sa matibay na pundasyong iyon para sa mas mataas na layunin,” ani Goitia.

Hindi lamang mga kasunduang diplomatiko ang nagpatatag sa ugnayan ng dalawang bansa. Pinanday rin ito ng pagkakaibigan, ugnayang pangkultura, at araw-araw na pakikipamuhay ng mga Pilipino sa Saudi Arabia. Sa paglipas ng panahon, naging higit pa sila sa lakas-paggawa at naging mahalagang bahagi ng makabagong pag-unlad ng Kaharian.

Kasabay ng pagbabagong ito, mabilis ding umuunlad ang Saudi Arabia.

Sa ilalim ng Vision 2030, umusbong ang Kaharian bilang lumalawak na pandaigdigang sentro ng pamumuhunan, inobasyon, turismo, renewable energy, healthcare, logistics, at digital services. Para kay Goitia, pagkakataon ito para sa Pilipinas na maging higit pa sa pinagmumulan ng mahuhusay na manggagawa at maging katuwang sa paglikha ng mga bagong oportunidad.

“May pananaw na ang papel lamang ng Pilipinas ay magpadala ng mga manggagawa. Naniniwala akong mas malaki ang maiaambag natin sa pamamagitan ng ating mga negosyo, institusyon, at mga negosyante, kasabay ng ating mga kababayang matagal nang bahagi ng pag-unlad ng Saudi Arabia,” aniya.

Malaki ang maiaambag ng mga Pilipinong negosyante, mga institusyong pang-edukasyon, service providers, agribusinesses, at maliliit at katamtamang laki ng mga negosyo sa lumalawak na ekonomiya ng Saudi Arabia. Kabilang sa may pinakamalaking potensiyal ang food security, renewable energy, at advanced technologies.

Ngunit para maisakatuparan ito, sinabi ni Goitia na hindi sapat ang matatag na ugnayang diplomatiko. Kailangan itong samahan ng mas matibay na ugnayan ng pribadong sektor upang maisalin ang tiwala sa kongkretong pamumuhunan, mga proyekto, at pangmatagalang pakikipagtulungan.

Gayunman, naniniwala si Goitia na ang pinakamalaking lakas ng ugnayang Saudi Arabia at Pilipinas ay nananatiling ang kanilang mga mamamayan.

Higit sa kalakalan at pamumuhunan, ang relasyon ng dalawang bansa ay hinubog ng mga henerasyon ng mga Saudi at Pilipinong magkasamang nagtrabaho, namuhay, at nagtayo ng mga komunidad. Ang makataong ugnayang ito ang nagpapatatag sa kanilang samahan hanggang ngayon.

Sa pananaw ni Goitia, malinaw ang susunod na hakbang: pangalagaan ang matibay na ugnayang pantao, palawakin ang kooperasyong pang-ekonomiya at pamumuhunan, at lumikha ng mga bagong oportunidad na nakaayon sa Saudi Vision 2030.

“Mayroon na tayong tiwala sa isa’t isa. Ang susunod na hakbang ay gawing kongkretong mga proyekto ang tiwalang iyon, mga proyektong kapwa maipagmamalaki at mapakikinabangan ng Saudi Arabia at Pilipinas,” ani Goitia.

Sa huli, ang hamon ay hindi ang bumuo ng panibagong ugnayan kundi ang palawakin ang matagal nang samahang itinayo sa tiwala at pagkakaibigan. Kung maisasalin ito sa mas maraming pamumuhunan, inobasyon, at konkretong proyekto, higit na makikinabang ang Saudi Arabia at Pilipinas sa mga susunod na taon.

Si Dr. Jose Antonio Goitia ay Chairman Emeritus ng Alyansa ng Bantay sa Kapayapaan at Demokrasya (ABKD), People’s Alliance for Democracy and Reforms (PADER), Liga Independencia Pilipinas (LIPI), at ng Filipinos Do Not Yield Movement (FDNY). Siya ay may hawak na Juris Doctor at Doctor of Philosophy (PhD), gayundin ang mga advanced degree na MNSA, MPA, at MBA, bukod pa sa iba. (BONG SON)