Barbie Imperial at Richard Gutierrez may plano na para sa isa’t isa

By Anne Venancio

Mas tumibay pa ang samahan nina Barbie Imperial at Richard Gutierrez matapos nilang pagsamahin ang kanilang husay sa hit Kapamilya action series na Blood vs Duty. Bukod sa pagiging magkaeksena, marami rin silang natutunan sa isa’t isa bilang mga propesyonal na artista.

Ayon kay Barbie, ito ang kauna-unahang serye na talagang sinubaybayan niya mula sa unang episode hanggang sa mga sumunod na kabanata. Ibinahagi ng aktres na na-inspire siya kay Richard na mas pag-aralan ang bawat detalye ng script at mas bigyang-pansin ang karakter na kanyang ginagampanan.

Samantala, sinabi naman ni Richard na naging magaan ang kanilang trabaho dahil naging sandalan nila ang isa’t isa sa mahabang oras ng taping. Hinangaan din ng aktor ang malaking pag-unlad ni Barbie bilang artista at ang natural nitong pagganap bilang Jamillah Abubakar.

May espesyal namang plano sina Barbie at Richard para sa nalalapit na kaarawan ng aktres. Sa halip na magkaroon ng isang engrandeng birthday celebration, bibisita ang dalawa sa Bicol upang magsagawa ng charity project sa grade school na pinanggalingan ni Barbie.

Aniya, mas magiging makabuluhan ang kanyang kaarawan sa pamamagitan ng pagbabahagi ng biyaya at pagtulong sa mga batang estudyante kaysa paggastos para sa isang marangyang selebrasyon.

Samantala, nalalapit na ang inaabangang finale ng Blood vs Duty. Tiyak na hindi ito palalampasin ng mga manonood dahil sa matinding aksyon, emosyonal na mga tagpo, at kapanapanabik na pagtatapos ng kuwento ng mga karakter na minahal at sinubaybayan ng mga Kapamilya viewers.