Tarriela kay Robin: “Bakit China ‘di mo mapahingi ng sorry?”; at Congratulations, Port of Zamboanga Coll. Atty. Zurbito!

Mariing binatikos ni Philippine Coast Guard (PCG) spokesperson for the West Philippine Sea Rear Admiral Jay Tarriela si Senador Robin Padilla dahil sa umano’y paggamit nito ng “double standard” sa paghawak sa mga isyung may kaugnayan sa China, kasunod ng naging pahayag ng senador tungkol sa kontrobersyal na video na inilabas ng China Daily na inilarawang racist ng maraming Pilipino.

Sa panayam sa One News program na Storycon, sinabi ni Tarriela na taliwas ang naging paninindigan ni Padilla sa dalawang magkaibang insidente.

Ayon sa opisyal ng PCG, agad siyang hinimok ng senador na humingi ng paumanhin nang magbahagi siya noon ng isang satirical image na may kaugnayan kay Chinese President Xi Jinping.

Ngunit sa pagkakataong ito, sinabi niyang tila walang panawagan si Padilla sa Chinese Embassy o sa China Daily na humingi rin ng paumanhin matapos umanong ilarawan ang mga Pilipino bilang mga unggoy sa isang video.

“This is another misplaced argument ng isang senador natin,” ani Tarriela.

Dagdag pa niya, hindi lamang ang pamahalaan kundi maging ang maraming Pilipino ang nagpahayag ng matinding pagkondena sa naturang video dahil sa umano’y mapanlait at mapanghamak na paglalarawan sa lahing Pilipino.

“Ang buong sambayanang Pilipino, all of our government agencies already responded to this racist video. All the people na makakapanood ng video na ito ay galit na galit. At ang ating pinakamagaling na senador na si Senator Robin Padilla ay tanggapin na lang daw nating unggoy tayong lahat,” saad ni Tarriela.

Nag-ugat ang palitan ng pahayag matapos akusahan ni Padilla si Tarriela sa isang Facebook post na umano’y nagpapalaganap ng “wartime propaganda.”

Ayon sa senador, ang pagtugon sa isyu sa pamamagitan ng kaparehong uri ng panunuya o pang-iinsulto ay hindi angkop at maaaring makasama sa diplomasya ng bansa. Iginiit din niya na bilang mga Asyano at may Austronesian heritage, hindi nararapat na gumanti sa parehong paraan.

Sa kabilang banda, iginiit ni Tarriela na ang usapin ay hindi tungkol sa pagganti kundi sa pagkakaroon ng pare-parehong paninindigan laban sa anumang uri ng diskriminasyon at pambabastos sa dignidad ng mga Pilipino.

Para sa kanya, kung mabilis na kinondena ang isang satirikong larawan na ginawa ng isang Pilipino, mas lalo umanong nararapat na kondenahin at hingan ng paliwanag ang isang dayuhang media organization na naglabas ng materyal na itinuturing ng marami bilang racist.

Patuloy na pinag-uusapan sa social media at sa iba’t-ibang sektor ang naturang isyu, kung saan maraming netizen ang naghahayag ng magkakaibang pananaw hinggil sa naging pahayag nina Tarriela at Padilla, gayundin sa tamang paraan ng pagtugon ng Pilipinas sa mga isyung may kinalaman sa China at sa West Philippine Sea.
***
Isa sa pinakamahalagang sangkap ng isang mahusay na institusyon ay ang kakayahang mapanatili ang maayos na takbo ng operasyon kahit may pagbabago sa pamunuan. Ang tunay na lakas ng isang ahensya ay hindi nasusukat sa iisang lider lamang, kundi sa kakayahan nitong ipagpatuloy ang mga programa at reporma sa kabila ng pagpapalit ng mga opisyal.

Ito ang ipinakita kamakailan ng Bureau of Customs – Port of Zamboanga sa isinagawang turnover ceremony para sa bagong District Collector na si Atty. Manuel O. Zurbito Jr., na pormal na humalili kay District Collector Elenita A. Abaño.

Bagama’t bahagi ng normal na takbo ng serbisyo publiko ang pagpapalit ng mga namumuno, mahalaga pa ring kilalanin ang naging ambag ng mga opisyal na naglingkod nang buong husay.

Sa panahon ni Collector Abaño, lalo pang pinatatag ang customs enforcement, pinahusay ang ugnayan sa mga stakeholder, isinulong ang trade facilitation, at napaangat ang operational performance ng Port of Zamboanga.

Hindi madaling pamunuan ang isang pangunahing pantalan na may malaking papel sa kalakalan at seguridad ng bansa.

Kaya nararapat lamang ang pagkilala sa mga programang kanyang naipatupad at sa pundasyong kanyang iniwan.

Kasabay nito, malaki rin ang inaasahan sa bagong District Collector na si Atty. Zurbito.

Hindi lamang pagpapatuloy ng mga nasimulan ang kanyang haharapin, kundi ang higit pang pagpapalakas ng revenue collection, border protection, trade facilitation, at pakikipag-ugnayan sa iba’t ibang sektor.

Sa Bureau of Customs (BOC), ang pagbabago ng liderato ay hindi dapat maging dahilan upang mabalam ang mga serbisyo. Sa halip, ito ay pagkakataon upang magdala ng mga bagong ideya at dagdag na sigla sa pagpapatuloy ng mga repormang sinimulan ng ahensya.

Kapansin-pansin na sa ilalim ng pamumuno ni Commissioner Ariel F. Nepomuceno, patuloy na isinusulong ng Bureau ang Integrity, Accountability, and Modernization (I AM) Agenda.

Layunin nitong gawing mas episyente, mas tapat, at mas moderno ang operasyon ng Customs—mga prinsipyong mahalaga upang mapanatili ang tiwala ng publiko at ng mga stakeholder.

Ang Port of Zamboanga ay isa sa mahahalagang daungan sa timog ng bansa. Bukod sa pangongolekta ng kita para sa pamahalaan, mahalaga rin ang papel nito sa pagpigil sa smuggling, paghadlang sa pagpasok ng mga kontrabando, at pagpapadali ng lehitimong kalakalan.

Kaya ang pagpapatuloy ng mahusay na pamamahala rito ay may direktang epekto sa ekonomiya at pambansang seguridad.

Sa huli, ang maayos na turnover ng liderato ay hindi lamang seremonyal na pagpapalitan ng posisyon. Isa itong malinaw na mensahe na ang institusyon ay mas mahalaga kaysa sa sinumang indibidwal.

Habang may malinaw na direksiyon, mahusay na koordinasyon, at iisang layunin, magpapatuloy ang BOC sa pagtupad sa mandato nitong pangalagaan ang hangganan ng bansa, paigtingin ang koleksiyon ng kita, at maghatid ng serbisyong karapat-dapat sa bawat Pilipino.

Ang maayos na transisyon sa Port of Zamboanga ay patunay na ang reporma ay nagpapatuloy, at ang BOC ay nananatiling nakatuon sa mahusay na pamamahala, modernisasyon, at tapat na paglilingkod sa bayan.
***
Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com.