Dennis Trillo nahigitan na ang dating pangarap na P15K TF

By Anne Venancio

Patunay na lahat ng pangarap ay nagsisimula sa maliit. Ibinahagi ng Kapuso Drama King na si Dennis Trillo ang isa sa mga pinakasimpleng pangarap niya noong nagsisimula pa lamang siya sa showbiz—ang magkaroon ng P15,000 na talent fee kada taping.

Sa contract renewal niya sa GMA Network noong Agosto 4, binalikan ni Dennis ang panahon na guest actor pa lamang siya. Kuwento niya, habang nasa taping ng Maalaala Mo Kaya, nakita niya ang talent fee ng isa niyang kasamahan. Noon niya naisip na balang araw, gusto rin niyang maabot ang ganoong halaga upang makapag-ipon at mabili ang mga pangangailangan niya.

Nang lumipat siya sa GMA mahigit dalawang dekada na ang nakalipas, unti-unti niyang nakita ang pag-asenso ng kanyang karera. Ayon kay Dennis, naramdaman niyang doon niya matatagpuan ang mas magandang oportunidad, at hindi siya nagkamali. Sunod-sunod ang mga proyektong ipinagkatiwala sa kanya hanggang sa tuluyan siyang maging isa sa mga respetadong aktor ng kanyang henerasyon.

Hindi rin itinago ni Dennis ang kanyang pasasalamat sa GMA Network. Aniya, malaking bahagi ng kanyang tagumpay ang tiwala at pagkakataong ibinigay sa kanya ng network, na hindi lamang nagpabago sa kanyang buhay kundi nakatulong din sa mga taong nasa paligid niya.

Matapos ang kanyang contract renewal, mapapanood si Dennis sa upcoming GMA drama series na “Hari ng Tondo” at sa pelikulang “Amir,” na isa sa mga official entries sa 52nd Metro Manila Film Festival ngayong taon.