71 FIXERS SA LTO TIMBOG, KASABWAT MGA OPISYAL

INARESTO ng Land Transportation Office (LTO) ang nasa 71 fixers sa operasyon nito sa Metro Manila mula Oktubre 2025, ayon kay LTO chief Assistant Secretary Markus Lacanilao.
Sinabi ni Lacanilao na mayroong 76 empleyado ng LTO na ang nahuli na rin sa umano’y pakikipagsabwatan sa mga fixer.
Sa 76 empleyado, 64 ang rank-and-file personnel habang 12 ang may high-ranking positions kabilang ang dalawang office chief.
Tinugis din ng LTO ang 90 online accounts na nag-aalok ng mga serbisyo ng fixer.
Noong Hulyo, nagpatupad ang LTO ng region-wide reassignment ng district heads nito sa National Capital Region kasunod ng pagkakaaresto sa tatlong fixers.
Ani Lacanilao, ang bawat LTO office chief ang responsable sa pagsisiguro na ang mga opisina sa ilalim ng kanilang pangangasiwa ay malaya sa mga fixer at iba pang iligal na aktibidad.
Hinimok naman niya ang publiko na makipag-ugnayan lamang sa mga tauhan ng LTO at isumbong ang mga anomalya sa ireportmokayltochief.ph para sa agarang aksyon.