REKLAMO NG REKLAMO HINDI NAGBABAGO

Saan patungo ang bansa sa sala-salabat na balita o impormasyon na sadyang inilalabas bilang sandata sa panlilo kay Mang Juan at sa bayan. Sa pagmamasid, galawang politika ang layon ng panlililo na gamit ang salapi ng bayan at sa dulo ng salang impormasyon, sakdal dami ng balik sa kakarampot na puhunan inilabas. Sa salang impormasyong nasasagap ni Mang Juan at ng bayan ang dahilan sa galit sa pamahalaang na walang malasakit sa hirap na kalagayan. Gamit ang panlililo bilang gatong sa pagpapakilos kay Mang Juan upang ipaabot sa kinauukulan ang pagkadiskuntento sa liderato na pikit ang mata sa katayuan ni Mang Juan at sa maliliit nating kababayan. Sa totoo lang, maraming kahilingan si Mang Juan na tinatalakay sa mga tanggapan ng pamahalaan ngunit ganap na talakayan ang regla at bahala na ang galawan sa kabutihan ni Mang Juan at taong bayan.

Sa pagsubaybay sa kagalingan pangmundo, silip na napag-iiwanan ang bansa sa maraming larangan, sa turismo, agrikultura, teknolohiya at iba pa. Subalit ‘di maungusan ang bansa higit ang mga nasa pamahalaan sa kagalingan sa pangungurakot ng mga opisyal na laging naka “head line” at laman ng social media. Hindi nawala ang atensyon sa Tanod Bayan na inihahayag na may opisyal o mga opisyal na sasampahan ng kaso sa pangungulimbat sa kabang bayan. Walang hindi nakakabatid sa mga politikong dagling nagkasakit at kailangan manatili sa pagamutan sa halip na humarap o harapin ang kasong isinampa. Sino ang ‘di nakakabatid sa kasanayan ng mga opisyal na gamay ang paggamit ng upuan de gulong. At ito balitang tuwinang mababasa sa ano mang uri ng pagpapaabot ng kaganapan sa bansa.

Pangyayari sa kasalukuyan ang banggit sa itaas na tila pinagyayabang sa kagalingan ng Pinoy na ang raket na gawa ‘y lumilipad sa mga tanggapan ng pamahalaan at ‘di kailangan ang tumingala ng ‘di malula sa laki ng hingi ng mga opisyal kahit may baha. Sa totoo lang, hindi mawala ang ngiti ni Mang Juan na makita ang mga gasdu na mga kinatawang bayan mula sa mga kapulungan nang pagkaratay sa karamdaman ngunit sa totoo lang higit na malakas kumpara kay Lolong ng Agusan Marsh. Mapalad ang isang kinatawan na maagang naabisuhan na dapat magkasakit ng kaibigang kumukumpas kung sino ang kakasuhan ng pagnanakaw. Naku, kagyat na nagkasakit at kailangan humiga sa kama ng karamdaman ng ‘di madala sa karsel ng katarungan. Sa kabilang dako, inaabangan ni Mang Juan ang paglabas ng “mugshot’ ng abalang pangulo na nakapagpiyansa ngunit ‘di makita ang larawan na may panukat sa likod o tagiliran. Hindi hinihintay na magkasakit si Inday Sira sa halip sabik na masilip ang larawang nakaamba ang kamao laban sa maghahain ng mandamiento de aresto.

Sa banggit na mga kaganapan sa itaas ang masasabing resulta ng kamangmangan ng Pinoy na naduyan ng mga panlililo ng mga politikong sakit ang pangungulimbat sa kabang bayan. Sa totoo lang, kailangan ng pagmumulat ng tao sa laylayan sa pagpili ng mga lider mula sa barangay tungo sa panguluhan ng ‘di maka-upo o pwesto ang makasarili at makapiling lider silip ang kataksilan sa bansa. Ang iangat ang kaalaman ng mga bobotante sa uri ng namumuno sa bansa ang unahin at bigyan pansin ng kasalukuyang lider ng ‘di mapariwara ang bayan sa susunod na panahon. Muli, bigyan puwang ang pagmumulat sa tao sa laylayan ng lumakad ang bansa tungo sa kaunlaran. Sa totoo lang, ang dating mga bansa na humahanga sa kagalingan ng Pinoy ang siya ngayong tinitingala dahil sa pag-unlad na may disiplina. Ang kagalinga’y nagsimula sa liderato o namumuno tungo sa tao sa ibaba ng lipunan. Sa totoo lang, mabigat ang hamon na baguhin ang nakasanayan higit ng Pinoy na lumaki o tumanda sa reklamo.

Kasanayan ng Pinoy ang pamumuna sa nagaganap sa bansa ngunit ‘di kumikilos upang mabago o baguhin. Sa pamumunang walang aksyon higit sa kasaysayan, naging mapangahas ang pamunuan sa pamahalaan na humakbang ng may karahasan sa kanyang panahon at napanatili ang liderato ng may kahabaan. Minsang napuno ang bayan, pinag-alsa balutan at sinipa ang lider patungo sa pagbabago ng liderato at tahakin sa hinaharap. Sa pagbabago ng liderato sa bansa, umasa ang bayan na magbabago ang kalakaran sa bansa at susulong ang kaunlarang asam para sa lahat. Hindi naganap. Nagsalin-salin ang liderato sa bansa ngunit ‘di lumisan ang reklamo ng bayan ang kaunlaran ng kabuhayan sanhi ng katiwalian.

Sa katunayan, may pinag-uugatan ang pagiging reklamador ng Pinoy higit kung tatanawin ang kalagayang pangkabuhayan, kasadlakan sa hirap. Sa nasilip na datos, ang bansa ang isa sa may mataas na bilihin sa Asya na ramdam ng tao sa laylayan ng lipunan. Ang masakit, palyatibo ang tugon ng pamahalaan, ang ayuda. Hindi kumikilos upang tumbukin ang sanhi ng mataas na presyo ng mga bilihin at nagkasya sa pansamantalang solusyon na ayuda. O’‘di ibig na tumbukin ang sagot sa kahirapan na tuwirang dahilan sa pangangalap ng kaperahan ng mga tiwali sa pamahalaan. Sa katunayan, si Jun Singhot ang naglabas ng bilyon – bilyong katiwalian sa pamahalaan na nagpalala sa kabuhayan ng tao sa laylayan higit sa panahon ng tag-ulan. At umaasa si Mang Juan na sa paglaan ng bagong pondo laban sa baha, tatabang muli ang mga lukbutan ng mga kawatan este kinatawan at bahala sa buhay ang tao sa laylayan.

Mang Juan, nasa tungki ng ilong ang sagot sa kaayusang asam para sa bayan. Ang kaayusang ibig ay magaganap sa pagbubukas ng mata, isip at puso na kailangan ang pagkakaisa at iisang kilos sa pagpapa-abot ng reklamo. Lipas na ang panahon ng reklamo ng reklamo na ‘di pansin ng tao sa pamahalaan dahil sa kabingihan o bulag sa laki ng pakinabang sa salapi ng bayan. Hindi gagalaw ang nasa trono dahil ang mapanatili sa pwesto ang ibig ng ‘di maduhagi sa hatian sa yaman na dulot ng bayan. Subalit, huwag magpakampante dahil nauulit ang kasaysayan na kusang kikilos ang kamay ng katarungan upang mapalitan ang lideratong walang pagmamahal sa bayan.

Panghuli, Mang Juan sa layon na makita ang pag-unlad ng kabuhayan, gumalaw para sa pagbabago at huwag ang reklamo ng reklamo ng matauhan ang tao sa gobyerno. Sa pagkakataong banggit, mag-iiba ang ikikilos ng liderato sa bansa unahin ang pagbabago’t kagalingan ng tao sa laylayan.

Maraming salamat po!!!!