Aby Maraño bisita sa TOPS

Dadalo sa pinakabagong edisyon ng Tabloid Organization in Philippine Sports (TOPS) Usapang Sports Forum sa darating na Huwebes (September 17) sa Philippine Sports Commission Media Room, Rizal Memorial Sports Complex, Manila ang NXLED Chameleons middle blocker na si Aby Maraño.

Pag-uusapan ni Maraño na dating team captain ng Alas Pilipinas Women’s Volleyball Team ang tsansa ng Pinay volleybelles sa papalapit ng 20th Asian Games, ang kanyang saloobin sa nalalapit na pagsabak sa PVL All-Filipino Conference at ang bagong karera na kanyang papasukan.

Magsisilbing itong huling sesyon ng TOPS Usapang Sports Forum na suportado ng PSC, Behrouz Persian Cuisine at Pocari Sweat bago magpapahinga muna ng ilang linggo upang magbigay-daan sa kampanya ng Team Pilipinas sa 20th Asian Games mula September 19-October 4, 2026 sa Aichi-Nagoya, Japan.

Inaanyahan ni TOPS President Nympha Miano-Ang ang mga miyembro, opisyales at tagasuporta na panoorin ang sesyon via livestream sa TOPS Sports, Bulgar Sports, Sportstek.ph, Sports Corner PH at Headline Eye News official Facebook pages.