TURISMO NG MAYNILA, MAY KITA NA, MAY KULTURA PA!

Hindi lamang sa dami ng mga aktibidad at pagdiriwang nasusukat ang pag-unlad ng turismo ng isang lungsod, kundi sa kakayahan nitong lumikha ng oportunidad sa kabuhayan, buhayin ang kultura at kasaysayan, at higit sa lahat, bigyang-pagkakakilanlan ang sariling komunidad.

Ito ang malinaw na mensaheng hatid ng naging tagumpay ng Department of Tourism, Culture and Arts of Manila (DTCAM) sa pamumuno ni Amanda “Cristal” Bagatsing sa ilalim ng administrasyon ni Manila Mayor Francisco “Isko Moreno” Domagoso ngayong 2026.

Sa ulat ni OIC-DTCAM Direk Bagatsing, umabot na sa 71 ang mga event na kanilang isinagawa mula Enero, tampok ang kultura, pamana, tradisyong panrelihiyon at iba pang mahahalagang okasyon na sumasalamin sa makulay na kasaysayan ng Maynila.

Ngunit hindi lamang pagdiriwang ang naging sentro ng mga programa. Sa pamamagitan ng anim na bazaar at trade fair, nakapagtala rin ang lungsod ng halos P5.4 milyon sa kabuuang benta, na nagbigay ng pagkakataon sa micro, small and medium enterprises (MSMEs) at lokal na negosyante na maipakilala at maibenta ang kanilang mga produkto.

Ibig sabihin, kapag maayos ang pagpaplano sa turismo, hindi lamang mga turista ang nakikinabang. Kasama sa umaani ng pakinabang ang maliliit na negosyante, manggagawa at mga pamilyang umaasa sa lokal na kalakalan.

Sa panahon ngayon na mahalaga ang bawat pagkakataong kumita, isang magandang hakbang ang pag-uugnay ng turismo sa kabuhayan ng mga ordinaryong mamamayan.

Maynila, sentro ng kultura at kasaysayan

Hindi rin matatawaran ang papel ng Maynila bilang sentro ng kasaysayan, kultura at ugnayang pandaigdig.

Ngayong taon, 1,323 bisita ang tinanggap ng lungsod sa pamamagitan ng 13 courtesy visit ng mga ambassador at dayuhang dignitaryo, gayundin ng 33 benchmarking at lakbay-aral ng mga lokal na grupo.

Patunay ito na nananatiling mahalagang destinasyon ang Maynila para sa mga nais matuto, makipagpalitan ng kaalaman at makita ang mga programang ipinatutupad ng lungsod.

Samantala, patuloy ring nagbibigay-buhay sa sining at kultura ang Manila Clock Tower Museum, na nakapagtampok ng 14 art exhibition at nagsagawa ng anim na inisyatiba para sa komunidad, turismo at pamana ng lungsod.

Sa mga ganitong programa, naipapakita na ang turismo ay hindi lamang tungkol sa mga gusali, pasyalan o litrato ng mga sikat na lugar. Kasama rito ang pag-iingat sa kasaysayan at pagbibigay ng espasyo sa mga alagad ng sining at sa mga kuwentong bumuo sa pagkatao ng Maynila.

My Manila Tourism Expo, bagong tatak ng turismo

Isa sa pinakamahalagang milestone ng lungsod ngayong taon ang matagumpay na pagsasagawa ng kauna-unahang My Manila Tourism Expo noong Setyembre 25 hanggang 27 sa Foro de Intramuros.

Sa loob lamang ng tatlong araw, 85 exhibitors ang nakiisa, 13,702 bisita ang dumagsa at mahigit ?5 milyon ang naitalang kabuuang benta.

Malaking tagumpay ito para sa isang bagong inisyatiba na naglalayong pagsama-samahin sa iisang lugar ang turismo, pamana, kultura, pagkain at malikhaing industriya ng Maynila.

Hindi lamang ito isang eksibisyon. Isa itong pagkakataon upang maipakita sa publiko na maraming dahilan upang balikan, tuklasin at ipagmalaki ang kabisera ng bansa.

Kasabay nito, inilunsad din ang bagong tourism brand na “MANILA, My Manila.”

Simple ngunit makabuluhan ang mensahe nito: ang Maynila ay hindi lamang lungsod na pinupuntahan para magtrabaho, mag-aral o magnegosyo. Isa rin itong lugar na puno ng mga alaala, kuwento, tradisyon at karanasang bahagi ng buhay ng bawat Pilipino.

Bawat isa ay may sariling kuwentong Maynila—at ito ang nais buhayin ng bagong kampanya.

Hindi pa rito nagtatapos ang mga programa.

Nitong nagdaang Sabado, Oktubre 24 na itinaon sa mismong kaarawan ni Yorme Isko ay idinaos ang Hopia Day at Intramumu sa Oktubre 31, bilang bahagi ng mga aktibidad na nagtatampok sa pagkain, kultura at kasaysayan ng lungsod.

Sa ganitong direksiyon, makikitang ang layunin ng DTCAM ay hindi lamang paramihin ang mga event kundi bumuo ng mas malawak na karanasan para sa mga turista at mismong mga Manileño.

Siyempre, hindi maikakaila na ang tagumpay ng mga programang ito ay bunga ng pagtutulungan ng iba’t ibang departamento ng pamahalaang lungsod, mga kawani, exhibitors, lokal na negosyo at iba pang katuwang.

Ngunit mahalaga rin ang pagkakaroon ng lideratong nagbibigay ng suporta sa mga bagong ideya at nagbubukas ng pagkakataon upang maisakatuparan ang mga ito.

Sa ilalim ng liderato ni Mayor Isko Moreno, may pagkakataon ang mga inisyatiba sa turismo na pinamumunuan ni Cristal Bagatsing maging bahagi ng mas malawak na layunin ng lungsod—ang palakasin ang ekonomiya, pangalagaan ang kultura at lumikha ng mga programang direktang nakikinabang ang mamamayan.

At kung pagbabatayan ang unang My Manila Tourism Expo, may magandang pundasyon nang maitatayo para sa mas malaking pagtitipon sa 2027.

Ang hamon ngayon ay kung paano mapananatili ang momentum, mapalalawak ang partisipasyon ng mga lokal na negosyo at matitiyak na ang mga benepisyo ng turismo ay mararamdaman hindi lamang sa malalaking event kundi pati sa mga komunidad.

Sa huli, ang tunay na tagumpay ng turismo ay hindi lamang nasusukat sa dami ng dumalo o laki ng kinita. Nasusukat din ito sa kung gaano karaming mamamayan ang nabigyan ng oportunidad, kung gaano kayaman ang kulturang naipasa sa susunod na henerasyon at kung gaano karaming tao ang muling naengganyong mahalin ang sariling lungsod.

Tama ang mensahe ng “MANILA, My Manila.” Ang turismo ng Maynila ay hindi lamang kuwento ng pamahalaan. Kuwento ito ng mga negosyante, manggagawa, alagad ng sining, komunidad at bawat taong may bahagi sa buhay ng lungsod.

Dahil sa bawat sulok ng Maynila, may kuwentong dapat alalahanin, kulturang dapat ipagmalaki at oportunidad na dapat palaguin.

Maynila ito – ‘Your Manila, My Manila!’
***
Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com.