Advertisers

Advertisers

FLOP NA SERYE SINISISI KAY KATHRYN BERNARDO

0 18

Advertisers

Ni Ethel G.

Hindi lahat ay kumbinsidong personal na buhay ni Kathryn Bernardo ang dahilan kung bakit hindi gaanong nag-iingay ang seryeng kanyang pinagbibidahan. Sa halip, marami sa mga netizens ang naniniwalang kuwento at direksiyon ng programa ang dapat sisihin.

Nagsimula ang diskusyon matapos kumalat ang blind item tungkol sa umano’y pagkadismaya ng ilang network executives sa seryeng pinagbibidahan ng malalaking artista ng istasyon.



Isa sa mga ipinunto sa blind item ang pagiging lantad umano ng love life ni Kathryn sa kanyang non-showbiz boyfriend, na sinasabing maaaring nakaapekto sa pagtanggap ng publiko sa pagpapares sa kanya sa matinee idol.

May netizen pang nagkomento na tila nawala raw ang dating charm ng aktres nang magkaroon siya ng non-showbiz boyfriend na isang politician. Pero may sumalungat naman at iginiit na walang kinalaman ang naging hiwalayan ni Kathryn sa kanyang dating karelasyon sa takbo ng kanyang career. Sa katunayan, mas gumanda pa raw ang career ng aktres matapos siyang manalo bilang Best Actress.



May nagsabi rin na nasa peak na sana ang aktres, pero tila unti-unting humihina ang momentum nito, kaya mas mabuting mag-concentrate muna siya sa kanyang career.

Gayunman, hindi lahat ay kumbinsidong lovelife ang problema. Para sa ilan, kahit si Kathryn pa ang bida, hindi nila gugustuhing panoorin ang serye dahil hindi sapat ang istorya para makuha ang kanilang interes.



May mga nagsabi ring mahirap makaramdam ng kilig sa tambalan dahil pareho nang may karelasyon ang dalawang bida. Dagdag pa rito, halata raw na trabaho lamang ang kanilang onscreen partnership at hindi natural ang pagpapakita ng sweetness.

Mas marami pa ngang nagbigay-diin na hindi kasalanan ni Kathryn kung hindi nagustuhan ng mga manonood ang kuwento. May mga pumuri pa sa acting ng aktres at ng kanyang mga co-star, pero hindi raw talaga nakatulong ang storyline.

May nagkomento ring hindi raw nararapat na si Kathryn ang sisihin dahil maging si Maja Salvador, na minamahal din ng publiko bilang artista, ay hindi rin basta-bastang makapagliligtas sa isang seryeng mahina ang kuwento.

Tinawag pa ngang ‘chopsuey’ ang takbo ng teleserye dahil paulit-ulit umano ang mga eksena, maraming flashback na parehong clips ang ipinakikita at tila walang makabuluhang development sa bawat episode.

Panahon na rin daw na mas bigyan ng pagkakataon ang aktres na magpakita ng ibang klase ng acting at tumanggap ng bagong kuwento sa halip na puro love story.

May nagbanggit din sa umano’y mga naging pagkaantala sa production dahil sa mga pagkakataong wala sa bansa ang aktres.

Nadamay rin sa diskusyon ang dating tambalan nina Kathryn at Alden Richards. May netizen na nagbigay ng opinyon na maaaring naging mas maingat na ang aktres sa paggawa ng romantic storyline matapos ang naging ingay at pambabatikos sa kanilang tambalan noon.

Hindi naman ito pinalampas ng ilang tagasuporta ni Alden. May mga nagtanong kung bakit kailangang idamay ang aktor sa usapin gayong wala naman siyang kinalaman sa kasalukuyang serye.

Nagkaroon tuloy ng palitan ng paliwanag ang mga netizens. Nilinaw ng isang nagkomento na hindi niya sinisisi si Alden at ang tinutukoy lamang niya ay ang epekto ng toxic love team culture at ang naging pressure sa kanilang tambalan noon.

May sumagot naman na hindi makatarungang ilihis ang sisi kay Alden at muling ipaalala ang dating tambalan gayong may sarili ring proyekto ang aktor na hindi rin dapat sukatin ang tagumpay batay sa pagiging love team.

Naging bahagi rin ng blind item ang umano’y paghinto muna sa malalaking proyekto ni Kathryn at ang isang malaking endorsement na sinasabing naka-pause dahil sa hindi maganda ang ratings ng programa.

Hindi naman daw ito nangangahulugang bagsak ang serye, pero malinaw na mas mataas ang inaasahan ng publiko sa isang proyektong pinagbibidahan ng isang superstar tulad ni Kathryn.