DATING GOBERNADOR NG SULTAN KUDARAT PROVINCE, HINIRANG NA KALIHIM NG TESDA

MAGIGING masigasig ngayon ang bagong administrasyon ng Technical Education and Skills Development Authority (TESDA ) dahil sa mga inilatag na programa at serbisyo sa komunidad sa ilalim ng pamumuno ni Suharto Mangudadatu, hinirang na bagong Kalihim ng ahensiya.

Sa ginanap na simpleng turnover ceremony noong Martes (June 13 ) sa TESDA auditorium, sinabi ng dating Gobernador ng Sultan Kudarat Province na malawak na rin ang kaalaman nito pagdating sa larangan ng public service at ilalatag ang magagandang programa sa naturang ahensiya.

Sa pag-upo ni Mangudadatu sa posisyon noong Hunyo 6,2023, ay inilatag ang kanyang 10-point agenda para sa susunod na anim na taon ng kanyang panunungkulan sa ahensya. Ang unang punto sa agenda na kanyang binigyang-diin ay ang TESDA sa Barangay. Ito ay naglalayong mabigyan ng access ang mga scholarship program at libreng training programs sa iba’t ibang barangay.

Ang pangalawa ay ang pagrepaso sa mga regulasyon sa pagsasanay ng TESDA. Ang inisyatiba ay tututuon sa muling pag-aayos ng mga teknikal na kursong bokasyonal upang matugunan ang pangangailangan ng industriya para sa lokal at ibang bansa na trabaho.

Ang Technical and Vocational Education Training (TVET) ay isa sa mga programa ng TESDA na nakikinabang sa mga marginalized na sektor, lalo na sa pagpapaunlad ng kanilang mga kasanayan at kaalaman sa iba’t ibang lugar.

Ang ikatlong agenda ay magbibigay-priyoridad din sa TVET upang matugunan ang pangangailangan ng industriya o lokalidad ng partikular na lugar. Ang pang-apat na agenda ay ang pagsunod at pinahusay na pagsubaybay. Regular ding susuriin ng ahensya ang mga tesda -accredited na paaralan at mga sentro ng pag-aaral upang suriin ang kanilang pagsunod sa mga kasalukuyang kinakailangan ng pagpaparehistro, sertipikasyon at pasilidad ng mga programa.

Bahagi rin ng 10 point agenda ang Youthpreneurship. Ang TESDA ay magkakaroon ng direktang pakikipagtulungan sa Sangguniang Kabataan (SK) at iba pang organisasyon ng kabataan sa bawat barangay at lokalidad para bumuo ng proseso ng information dessimination at bigyang kapangyarihan ang mga kabataan para sa pagpapaunlad ng kanilang mga kasanayan sa pamamagitan ng TESDA programs and interventions.

Ang susunod na hakbangin na nais ipatupad ni Secretary Mangudadatu ay ang TESDA Industry Exchange Program. Ito ay magpapalakas sa pagtutulungan sa patuloy na pagsasanay ng mga trainers at mag-aaral sa pagitan ng industriya at TESDA.

Si Kalihim Mangudadatu ay magdadala rin ng HALAL TVET na magbubukas ng pagkakataon upang matugunan ang Halal na mundo ng negosyo sa pamamagitan ng pagpapakilala at pagsulong ng HALAL TVET.

Ang huli at isa sa pinakamahalaga ay ang pagpapalakas at regeneration ng internal structure ng ahensya. Sisiguraduhin ng pamunuan ng Mangudadatu na ang lahat ng departamento, dibisyon at tanggapan ng ahensya ay maaasahan at may pananagutan sa tiwala at kumpiyansa ng mga management sa pagbibigay ng mga kinakailangang pang-edukasyon na pangangailangan ng mga estudyante at trainers.

Sa bagong hanay ng mga opisyal ng TESDA, tiniyak ng ahensya na patuloy itong magbibigay ng mga dekalidad na programa at proyekto na makatutulong sa pag-angat ng buhay ng mga mahihirap sa bansa o sa ‘poorest of the poor’. (JOJO SADIWA)