Mababang bilang na kasambahay na SSS members silip ni Sen. Tulfo

KINASTIGO ni Senador Raffy Tulfo ang napakababang compliance ng Social Security System (SSS), Philippine Health Insurance Corporation (PhilHealth) at Home Development Mutual Fund o Pag-IBIG para sa coverage ng mga kasambahay.

Batay sa 2019 joint survey na isinagawa ng Philippine Statistics Authority (PSA) at Department of Labor and Employment (DOLE), mayroong 1.4 milyong rehistradong domestic worker.

Nabatid na sa 1.4M ay 6% o 84,190 kasambahay lamang ang na-enroll ng kanilang mga employer sa SSS habang 5% o 74,858 lamang ang nakarehistro ng pareho sa PhilHealth.

Ang malala pa, aniya, ay 3.4% o 51, 579 na tulong sa bahay lamang ang na-enroll ng kanilang mga amo sa Pag-IBIG.

Binigyang-diin ni Tulfo, vice chairperson ng Senate Committee on Labor, Employment and Human Resources Development, na hindi sapat ang ginagawa ng mga nasabing ahensya upang matiyak na ang mga employer sa bansa ay nirehistro ang kanilang kasambahay at binbayarang ang SSS, PhilHealth, at Pag-IBIG kontribusyon ng mga ito.

Nanggalaiti din si Tulfo dahil sa kabiguan ng mga barangay na ipatupad ang sistema ng pagpaparehistro para sa mga kasambahay, kahit alam nila na ang ilang employer ay masyadong abala upang i-enroll ang kanilang kasambahay para sa nasabing coverage o sadyang iniiwasan gawin ito upang maiwasan ang mga pagbabayad.

Sa ilalim ng “Domestic Workers Act” o “Batas Kasambahay,” ang bawat employer ay dapat irehistro ang kanyang kasambahay sa barangay kungsaan siya naninirahan.

Ang Punong Barangay ay responsable para sa Registry ng kasambahay sa loob ng kanyang nasasakupan.

Kinuwestiyon din ni Tulfo kung bakit aktibo ang mga opisyal ng barangay mag bahay-bahay noong panahon ng halalan ngunit hindi nagawang mag-door-door upang mag-survey sa mga household na may mga kasambahay at matiyak ang pagpapatupad ng Batas Kasambahay.

Bukod dito, inirekomenda rin ni Tulfo na tanggalin ang ‘qualified theft’ na parusa sa pagnanakaw para sa mga kasambahay, na ginagamit ng mga employer para pag-initan at idiin sila sa kasalanang ‘di nila ginawa. (Mylene Alfonso)