CHINESE WARSHIPS BINUNTUTAN MGA BARKO NG PINAS AT US SA WPS!

PATULOY parin ang China sa mga ginagawang agresibong aksyon nito sa West Philippine Sea.

Ito ay matapos na buntutan ng dalawang barkong pandigma ng China ang mga barko ng Pilipinas at Estados Unidos sa kasagsagan ng isinasagawang ikalawang joint maritime patrols sa West Philippine Sea.

Sa ulat, limang beses nagsagawa ng radio challenge ang BRP Ramon Alcaraz sa naturang mga barko ng China dahil sa naturang mga aksyon nito, ngunit hindi manlang ito nakatanggap ng anumang response mula sa China.

Ang naturang Chinese warships ay natukoy ng mga kinauukulan bilang guided missile destroyer Hefei (174) at frigate Huangshan (570) na bumuntot sa BRP Ramon Alcaraz, BRP Gregorio del Pilar, at BRP Davao del Sur.

Pero sa kabila ng pagbuntot na ito ng mga barkong pandigma ng China sa mga barko ng Pilipinas ay hindi parin ito nakahadlang sa pagpapatuloy ng joint maritime patrols ng ating bansa kasama ang Estados Unidos.

Sa naturang joint maritime patrols ng Pilipinas at Amerika sa loob ng Exclusive Economic Zone ng Pilipinas, nagdeploy ang Philippine Navy ng apat na barko habang ang US Indo-Pacific Command naman ay nagdeploy din ng four vessel flotilla na binubuo ng aircraft carrier, guided missile cruiser, at dalawang destroyers.