DIPLOMATIKONG PAG-UUSAP O DIYALOGO ANG SUSI SA KAPAYAPAAN

Mahalaga ang maayos na ugnayan ng Pilipinas at China para sa kapayapaan at katatagan sa rehiyon.

Kaya positibong hakbang ang hangarin ni Pangulong Ferdinand Marcos Jr. na i-reset ang relasyon ng dalawang bansa.

Mas mainam ang pag-uusap kaysa sa patuloy na pagtaas ng tensyon sa West Philippine Sea (WPS).

Ang bukas na komunikasyon ay nagbibigay ng pagkakataong maresolba ang mga hindi pagkakaunawaan sa mapayapang paraan.

Hindi nangangahulugan ang pakikipag-usap na isinasantabi na ang ating mga karapatan bilang isang malayang bansa.

Sa halip, aba’y ipinapakita nito ang kahalagahan ng diplomasya sa pagharap sa masalimuot na usapin.

Tama rin ang paninindigan ng pamahalaan na humingi ng malinaw na ebidensya bago kilalanin ang anumang sinasabing kasunduan.

Sa usaping pambansa, mahalagang nakabatay sa dokumento at katotohanan ang bawat desisyon ng gobyerno. Siyempre, importante ring panatilihin ang pagiging bukas sa palitan ng pananaw upang maiwasan ang alitan.

Dapat manatiling pundasyon ng relasyon ng magkabilang panig ang paggalang sa isa’t isa.

Kasabay nito, nararapat na patuloy na ipagtanggol ng Pilipinas ang soberanya at pambansang interes.

Hindi kailanman dapat isuko ang ating mga legal na karapatan habang isinusulong ang mapayapang pakikipag-ugnayan.

Masasabing ang tunay na tagumpay ay hindi lamang ang pag-iwas sa sigalot kundi ang pagbuo ng matatag, magalang, at kapaki-pakinabang na relasyon para sa kapakanan ng sambayanang Pilipino.

***

Catch Gilbert Perdez on “TODO BALITA” every Saturday from 4:00 AM to 5:00 AM on DWIZ 882 AM and ALIW Channel 23, and on “BRGY. 882” from 7:00 AM to 8:00 AM. Tune in via ALIW Channel 23, DWIZ 882 AM, the DWIZ 882 Facebook page, or DWIZ On-Demand on YouTube. For comments and inquiries, you may contact him by email at gil.playwright@gmail.com.