DOKTORA SINAMPAL, LADY GUARD SINUNTOK NG LASING!

KALABOSO ang isang lalaki nang sampalin ang doktora, at sinuntok ang lady guard ng ospital kungsaan namatay ang kanyang kapatid sa Maragondon, Cavite noong Huwebes.

Kasong ‘Slight Physical Injury’ at ‘Slander by Deed’ ang kinakaharap ng suspek na si alyas “Fernando” ng Barangay Ganta-A Maragondon, Cavite dahil sa reklamo ni alyas “Dra Jhena” at alyas “Mariel” isang security guard.

Sa ulat, dumating sa Cavite Municipal Hospital ang suspek 2:00 ng hapon at nang makita si Mariel ay bigla niya itong sinugod, sinuntok at minura.

“Pinabayaan ninyo ang kapatid ko kaya namatay,” sigaw pa nito na sinisisi ang mga tao sa nasabing ospital sa sinapit ng kanyang kapatid.

Dumiretso si Fernando sa loob ng ospital at walang sabi-sabing sinampal ang doktora sa harap ng ilang pasyente at hospital staff.

Agad namang nakatawag ng police assistance ang lady guard na nagresulta sa pagkakaaresto kay Fernando.