PANAWAGAN NI DUTERTE IHIWALAY ANG MINDANAO SA PILIPINAS BINASURA NG KAMARA
Kakasuhan ng nanawagang pagwatak-watakin ang mga Filipino
Advertisers
TAHASANG ibinasura ang panawagan ni dating Pangulo Rodrigo Duterte na ihiwalay ang Mindanao sa Pilipinas sa pamamagitan ng nilagdaang manipesto sa Kamara de Representantes.
Nilagdaan ang Unified Manifesto for Integrity and Development ng may 57 miyembro ng House of Representatives, 53 dito ay mula sa Mindanao bilang pagpapakita para sa mariin nilang pagtutol sa plano ni FPRRD para sa independent Mindanao.
Ang manifesto ay nilagdaan ng 53 Mindanao lawmakers, tatlo rito ay partylist representatives, at isang House member mula sa Visayas, na labis ang kanilang pagtutol sa panawagan na gawing Mindanao secession.
“We signed the manifesto as one voice, one nation, rejecting all calls for the secession of Mindanao. We will not be a party to an unconstitutional proposal to break the territorial integrity of the Philippines. We make our intentions known, as Mindanao lawmakers,” saad ni Lanao del Norte 1st District Rep. Mohamad Khalid Dimaporo, isa sa signatories at chair ng House Committee on Muslim Affairs.
Aniya, ang panawagan ni Duterte at Davao del Norte Rep. Pantaleon Alvarez para sa independent Mindanao ay humakot lamang ng labis na kritisismo mula sa iba’t-ibang sektor sa buong Pilipinas.
Ipinababatid din ng mga mambabatas ang kritikal na papel ng Mindanao sa national economy kaakibat narin dito ang naging ambag ni Pangulong Ferdinand R. Marcos, Jr. na i-prioritize ang pagsulong sa buong rehiyon.
Nakasaad din sa manifesto na kanilang kinokondena at nararapat lamang na makasuhan ang sinomang indibidual o grupo na may layuning pagwatak-watakin ang mga Pilipino na anila’y direktang nilalabag ang ating Saligang Batas.
“We call for the diligent prosecution of all individuals and entities fostering disunity among our people, blatantly violating our Constitution, and threatening the sovereign integrity of our nation, such actions not only undermine our democratic principles, the peace and security of our communities, and the collective welfare of the Filipino people but also betrays our oath of office to support and defend the Constitution, and to bear true faith and allegiance to the same, imposing upon ourselves this solemn obligation voluntarily, without mental reservation and purpose of evasion,” nilalaman din ng manifesto. (Henry Padilla)