Baste Duterte magsisilbing acting mayor ng Davao City

SINABI ng Commission on Elections (Comelec) na wala na sa hurisdiksyon ng komisyon kundi nasa Department of the Interior and Local Government (DILG) ang kapalaran ni dating Pangulong Rodrigo Duterte bilang Davao City mayor.

Ayon kay Comelec Chairman George Garcia, hangga’t walang nakabinbing kaso ang mga nanalong kandidato sa Comelec, ang kanilang hurisdiksyon ay ililipat sa DILG.

Sa ilalim ng succession, sinabi ni Garcia na ang naproklamang vice mayor ang magsisilbi bilang acting mayor.

Magsisilbing acting mayor ng Davao City si Vice Mayor Baste Duterte sa gitna ng pagkakakulong ni dating Pangulong Duterte sa The Hague, Netherlands, ayon sa Commission on Elections.

Sinabi ni Garcia na ang nanalong kandidato na nasa labas ng bansa ay maaring manumpa sa ambassador o Philippine Consul General.

Ani Garcia, walang nakalagay sa ating batas kung saan pupuwedeng mag-oath ang isang tao.

Ang dating Pangulo ay naaresto noong Marso 11 paglapag mula Hong Kong sa kahilingan ng International Criminal Court (ICC) kaugnay sa imbestigasyon sa kanyang war on drugs. (Jocelyn Domenden)