6 AIRPORT WORKERS SA IBAT-IBANG PROBINSYA, NAGPOSITIBO SA ’RANDOM DRUG TESTING’

SINIBAK ng Civil Aviation Authority of the Philippines (CAAP) ang anim na airport workers matapos magpositibo sa droga, inihayag nitong Lunes.

May kabuuang 1,703 ang sumailalim sa random drug testing sa hindi bababa sa 14 sa 44 CAAP-operated airports mula Pebrero hanggang Agosto. Tatlo sa mga nagpositibo ay mula sa Butuan Airport. Ang General Santos International Airport, Ozamiz Airport, at Bacolod-Silay Airport ay may tig-isang tauhan na nagpositibo.

Ayon sa CAAP, ang drug testing ay umaayon sa Philippine Civil Aviation Regulation on Psychoactive Testing and Reporting, at sa Civil Service Commission na nangangailangan ng mandatory drug testing para sa mga bagong empleyado ng gobyerno at para sa mga empleyadong nananatili sa serbisyo ng gobyerno.

Sinabi ni Dr. Rolly Bayaban, chief flight surgeon ng CAAP’s Office of the Flight Surgeon and Aviation Medicine, patuloy na inuuna ng awtoridad ang inisyatiba na ito. Ang kaligtasan at kahusayan ng mga operasyon ng aviation ay lubos na nakasalalay sa pisikal at mental na kagalingan ng lahat ng mga tauhan ng aviation.

Ipinatutupad ng CAAP ang mahigpit na monitoring protocols at pinapalakas ang pananagutan ng mga tauhan upang mapangalagaan ang kaligtasan ng pasahero at mapanatili ang tiwala ng publiko. (JOJO SADIWA)