MAPAMINSALANG KORAPSYON
Advertisers
Patuloy ang pagsubok ng Sanlumikha sa Pinoy sa pagdalaw ng sunod – sunod na mapaminsalang likas na kaganapan sa bansa at tila iniinot -inot ang buong kapuluan. Sa nakaraang mga araw, humagupit ang bagyo na inilubog ang maraming bahagi ng kaBisayaan higit ang lalawigan ng Cebu sa malalim na baha. Sa pagtatala, ang umagos na tubig ulan sa lalawigan sa loob ng ilang araw ay kasin-dami sa isang buwan at kalahati na karaniwan sa panahon ng tag-ulan. Hindi karaniwang makita na nababad ang lalawigan ng Cebu sa tubig baha at ang iisang kaganapan na hindi malilimutan ng mga Cebuano.
Sa totoo lang, masakit na makita ang nakasalansan ang mga sasakyang inanod ng tubig baha na larawan ng bagsik ng bagyong tumama sa lalawigan, mga Cebuanong na nasa ibabaw ng bubungan na naghihintay na masagip sa tumataas na tubig baha. Ang ‘di mabilang na dami ng mga nasawi at maraming ‘di pa nakikita na tinangay ng tubig baha.
Mang Juan, hindi pa tapos ang pagsubok sa / dahil sa may naka-ambang malakas na bagyo ang muling dadalaw sa bansa at maaaring sumalanta sa ilang lalawigan sa bansa. Inaasahan ang maagang paghahanda ng mga lalawigan na mahahagip ng papasok na bagyo higit sa nakitang pinsala na naganap sa mga lalawigan sa kaBisayaan. Hindi ibig ang tuwirang pagtama at ipinagdadasal ang pananatili ng bagyo sa karagatan o ganap na malusaw ng ‘di tuwirang mapinsala ang lugar na dadalawin. Batid na ‘di sapat ang ilang araw na paghahanda ngunit mabuti ang maghanda sa halip na tumunganga. Ang nagapan sa kaBisayaan ang nagpapahirap sa pamahalaan na maging lubos ang paghahanda sa darating na bagyo ngunit batid na ‘di magpapabaya ang tao at mga lokal na opisyal higit sa nakitang pinsala ng nagdaang bagyo.
Sa totoo lang, tunay na masalimuot ang pagharap sa sitwasyon na gumagalaw sa pag-ayuda at ang paghahanda sa kabilang dako. Hindi madaling humila ng mga tauhan na may kakayahan sa mga pagsagip ngunit haharapin ang sitwasyon sa anumang paraan o galawan. Walang kakabigin at lahat ay itutulak patungo sa galawang serbisyong bayan higit ng mga tauhan sa pamahalaan na sanay sa pagharap sa hamon ng panahon. At inaasahan ang ilang mga grupo o indibidwal na malaki ang puso na handang ialay ang oras at ilang kaperahan sa pagtulong sa mga na-apektuhan at maapektuhan ng ganap na makabagon sa buhay. Ang pagtulong sa iba’y karaniwan sa Pinoy na likas ang pagiging mabait at mabuti higit sa oras ng pangangailangan ng iba.
Ang likas na pagiging matulungin ng Pinoy ang inaasahan sa kasalukuyang panahon na silip sa nakaraan na ‘di ganap ang tulong na natatangap ng bansa sa mga kalapit-bansa na naumay sa salang gawa sa nakaraan. Ang mga tulong na hatid sa nakaraan na ‘di namalas na naihatid sa mga dapat abutan ang nagpatamlay sa kalapit-bansa na magpadala ng tulong. Ganap na masakit sa loob na ‘di makita ang mga bagay o ayudang iniaabot na ‘di nakuha o napunta sa dapat abutan. At ang dahilan ng pagtamlay sa pag-aabot ng tulong mula sa ibang lahi o maging sa kapwa Pinoy. Higit na masakit na mabatid na nasa kamay ng iilan korap na opisyal ang mga ayuda sa nakaraan na ‘di umabot sa mga napinsala ng mga delubyo sa nakaraan.
Sa totoo lang, kayang – kaya ng Pinoy ang lagpasan ang mga pagsubok na nasa harap ngunit masakit na makita na tila naliligayahan ang ilan higit ang mga opisyal na ginagawang Negosyo ang kalamidad at pagtulong sa tao sa laylayan. Ang ‘di mga nakitang multong proyekto ang ganap na dahilan sa mga nagaganap na kalamidad dahil sa kasakiman ng iilan. Ang pagbubungkal ng mga kabundukan dahil sa pagmimina, ang pagputol ng mga punong kahoy at ang pagpapatag ng mga kabundukan para maging subdivision ang lantarang gawa na sanhi ng mga nararanasang delubyo. Ang higit na masakit, hindi nakuntento ang mga sakim higit ang mga politiko, humirit pa ng proyektong babalikatin ng tao sa laylayan, ang swerte niyo naam. At kapagdaka, ubos ang salaping bayan ngunit nahan ang proyekto, na tutustusan o babalikatin ng tax-ng ina mo. At isa pang higit na masakit, di na umaamin sa salang gawa at tila sinisisi si Mang Juan dahil ‘di naging mapagbantay sa mga multong proyektong may dala ng baha sa kanilang tahanan.
Mang Juan, hindi matatapos ang iyong pasanin at umasa na may pangalawa o pangatlo at hangang magpalit ng papasan sa kasakiman ng iilan. Ang walang kabusugan ng iilan na nagaganap sa bayan ay deka-dekada ng pasanin na ‘di nasilip sa nakaraan. Ang paglapastangan sa kapaligiran ang salarin sa pagkawala ng maraming buhay at ang kasakiman ng iilan higit ng mga politiko ang umaagaw sa kaning isusubo sa inyong hapag. Malinaw na magkatuwang ang kasakiman ng iilang nagkaroon ng kaperahan na ginawang puhunan sa panlililo sa bayan sa ngalan ng serbisyo kuno ngunit galawang pansarili o pampamilya. Wala ang bayan sa pintig ng puso ng mga sakim at tulad ng banggit sa itaas, Negosyo ang pagtulong sa tao sa laylayan at ‘di serbisyo.
Bayan ang nagaganap na delubyo na likha o gawa ng kalikasan ang resulta ng kaganidan ng iilan sa ibig na maging higit na magaling sa nakakarami sa ano mang larangan. Walang puwang ang tunay na serbisyo sa bayan sa mga opisyal na ang ibig ay ang makalamang at lumayo sa nakararami. Huwag umasa na magiging malapit sa mga opisyal ng bayan dahil tunay na iba ang batayan ng mga politiko sa serbisyo, ang makalap ang salaping dapat makalap at hayaan ang bayan na humurap sa delubyo ng kalikasan. Bayan, ang tunay na mapaminsala ay ang pagiging ganid ng mga opisyal na walang paki sa tao sa laylayan. At sa totoo lang, ang korapsyon ang mapaminsala na silip sa gawa ng multong proyektong kumikitil sa buhay at kabuhayan ng mamamayan.
Maraming Salamat po!!!!