MIYEMBRO NG CTG SA NORTHERN SAMAR, ‘NALAMBAT’ SA TERMINAL NG BUS SA PASAY

ISANG miyembro ng Communist Terrorist Group (CTG) ang matagumpay na nahuli noong Biyernes ng gabi, mula sa isinagawang operasyon sa isang terminal ng bus sa EDSA, Pasay City.

Ang akusado, na kinilala bilang alyas Belho o Yani, 29, ay nasa listahan bilang No. 8 Top Ten Most Wanted Person (TTMWP) sa Provincial level ng Northern Samar para sa Abril 2026. Siya ay isang nakalistang miyembro ng Sub-Regional Guerrilla Unit (SRGU), Eastern Visayas Regional Party Committee (EVRPC), at naiulat na sangkot sa mga taktikal na opensiba laban sa mga tropa ng gobyerno, kabilang ang isang ambush noong 2018 sa Las Navas.

Ang operasyon ay pinangunahan ng District Special Operations Unit (DSOU-SPD) sa ilalim ng pamumuno ni PLTCOL Antonio G Ananayo Jr., Chief, DSOU. Ang pag-aresto ay isang pinagsamang pagsisikap ng District Intelligence Division (DID-SPD), DMFB-SPD, at mga yunit ng probinsya mula sa Northern Samar Police Provincial Office.

Ang akusado ay dinakip sa bisa ng isang Warrant of Arrest para sa Tangkang Pagpatay na may inirerekomendang piyansa na PhP100,000.00. Ang warrant ay inilabas noong Hunyo 30, 2021, ni Hon. Ricardo Estavillo Amos, Presiding Judge ng Regional Trial Court Branch 22, Laoang, Northern Samar.

Batay sa record,ang suspek ay dating bahagi ng Special Partisan Unit (SPARU) at naiugnay sa ilang pagpatay sa mga tauhan ng CAFGU sa Northern Samar.

Sinabi ni PCOL Glenn Oliver C Cinco, Acting District Director ng Southern Police District (SPD) na ang pag-aresto sa indibidwal na ito ay isang malinaw na mensahe na ang SPD ay hindi kailanman matitinag sa paghahangad nito ng hustisya, at patuloy na pinaninindigan ang pangako sa pambansang kapayapaan at seguridad. (JOJO SADIWA)