ISKO sa Builders: Hindi puro kita, pabahay para sa tao

KAMAKALAWA ay ipinrisinta ni Manila Mayor Farncisco “Isko” Moreno Domagoso kay Frederick Go ang kongkretong plano para sa itatayong 7-storey na modernong Ospital ng Tondo, at binigyang-diin ang malaking ginhawa at mas maayos na serbisyong medikal na matatamo ng mga residente sa oras na maitayo ang bagong pasilidad.

Ayon kay Yorme, ang bagong tahanan ng Ospital ng Tondo, na dating kilala bilang Emmanuel Hospital, ang magbibigay ng mas malawak, mas moderno, at mas kumpletong serbisyong pangkalusugan para sa mga taga-Tondo at karatig-lugar.

Idiniin ni Isko na hindi lamang ito simpleng pagpapatayo ng gusali, kundi isang hakbang para tiyakin ang mas mabilis na gamutan, mas maayos na pasilidad, at mas dignidad na pag-aalaga sa mga pasyente.

Binili ng Pamahalaang Lungsod ang lote sa Abad Santos Avenue na pag-aari ng estado upang maging permanenteng lokasyon ng ospital.

Popondohan ang proyekto sa pamamagitan ng pinagsamang pondo mula sa lokal at pambansang pamahalaan, na patunay ng pagtutulungan upang maiangat ang serbisyong pangkalusugan sa Maynila.

Sa sandaling makumpleto, inaasahang mas marami pang pasyente ang mabibigyan ng agarang at de-kalidad na serbisyong medikal, habang mababawasan ang siksikan at limitasyon sa kasalukuyang pasilidad.

Para kay Moreno, bahagi ang modernisasyon ng Ospital ng Tondo ng mas malawak na layunin na palakasin ang pampublikong serbisyong pangkalusugan at tiyaking hindi napapabayaan ang mga komunidad na higit na nangangailangan.
***
Sa harap ng mga malalaking pangalan sa real estate industry, hindi nagpaligoy-ligoy si Yorme Isko .

“I will spend efficiently, I will collect effectively. ‘Pag kinolekta ang piso, piso ang resibo mo.”

Isang simpleng linya — pero mabigat ang mensahe. Sa panahong ang tiwala sa pamahalaan ay madaling mabasag, malinaw ang hamon ni Moreno sa pribadong sektor: kung susuporta kayo sa pabahay ng Maynila, sisiguraduhin naming malinis ang sistema.

Sa harap ng mga miyembro ng Chamber of Real Estate & Builders’ Associations, Inc. (CREBA), iginiit ng alkalde na ang real estate ay hindi lang negosyo. Ito ay industriya na humuhubog sa mukha ng lungsod at sa kinabukasan ng libo-libong pamilya.

Hindi Relokasyon, Kundi Dignidad.

Matagal nang sugat ng Maynila ang usapin ng informal settlers. Ilang dekada nang paulit-ulit ang eksena: gigibain sa lungsod, ililipat sa malayong probinsya, babalik din dahil narito ang trabaho.

Dito pumasok ang paninindigan ni Moreno — in-city housing, hindi itinataboy kundi isinasama sa pag-unlad.

Hindi ito retorika para sa kanya. Lumaki siya sa Tondo. Alam niya ang pakiramdam ng walang kasiguruhan sa tirahan. At marahil dito nanggagaling ang mas personal niyang atake sa isyu.

“Nauunawaan natin ang mindset ng isang squatter na pamilya,” aniya.

Kapag ang lider ay may karanasang hinuhugutan, mas nagiging malinaw ang direksyon ng polisiya.

“Bahay ng Kalapati” o Bahay ng Pamilya?

Diretsahan din ang pahayag ng alkalde:

“Ayaw kong magtatag ng bahay ng kalapati.”

Hindi lihim na maraming proyektong pabahay sa bansa ang tila kahon lamang — masikip, hindi akma sa pamilya, at kulang sa dignidad.

Sa ilalim ng kanyang administrasyon, itinayo ang mga proyektong gaya ng Tondominium at Binondominium — mga vertical housing na may mahigit 40 sqm na unit at may dalawang silid. Hindi pang-isahan. Pang-pamilya.

Kung mamumuhunan din lang ang lungsod, bakit hindi taasan ang pamantayan?

Ekonomiya at Pananagutan

May mas malaking larawan dito. Ayon kay Moreno, ang konstruksyon ay isa sa pinakamalakas na economic stimulant ng isang bansa. Kapag gumalaw ang real estate, gumagalaw ang trabaho — mula mason hanggang supplier.

Pero may kapalit ang pakikipagtulungan: transparency.

Sa gitna ng panawagan niya sa developers na suportahan ang pabahay ng lungsod, malinaw ang kanyang pangako — bawat pisong kokolektahin ay may katapat na resibo.

Sa huli, ang tanong ay hindi lang kung gaano karaming gusali ang maitatayo.

Ang tunay na sukatan: Ilang pamilya ang mabibigyan ng disenteng bubong? Ilang bata ang lalaking may sariling silid? Ilang manggagawa ang hindi na kailangang bumiyahe ng apat na oras pauwi?

Kung pabahay ang usapan, hindi ito simpleng proyekto.

Ito ay usapin ng dignidad.
***
Para sa inyong mga suhestyon, reaksyon at opinyon ay sumulat o magmensahe sa bampurisima@yahoo.com.