3 AIRPORT SECURITY OFFICERS, INIIMBESTIGAHAN SA PAGKAWALA NG PERA NG AUSTRALYANO SA NAIA 3

TATLONG empleyado ng paliparan ang iniimbestigahan at maaaring kasuhan ng kriminal at administratibo matapos mawalan ng halos P9,000 na pera ang isang Australyano na patungong Cebu na sumailalim sa luggage screening sa Ninoy Aquino International Airport (Naia) Terminal 3 noong nakaraang linggo.

Sinabi ng Department of Transportation (DOTr) na ipinag-utos ni Secretary Giovanni Lopez ang isang imbestigasyon at ang pagtanggal sa tatlong empleyado ng Office for Transportation Security (OTS)—dalawang security screening officer at isang supervisor—matapos iulat ng Australyano ang pagkawala ng kanyang pera na binubuo ng P7,000 at 1,000 Taiwanese dollars (humigit-kumulang P1,900).

Inutusan din ni Lopez ang OTS na magsagawa ng masusing inspeksyon sa mga bagahe ng mga pasahero at mahigpit na bantayan ang mga security screening officer.

Hinimok din niya ang mga pasahero na iulat ang anumang tauhan ng paliparan na sangkot sa mga kahina-hinala o ilegal na aktibidad ngunit iminungkahi rin na huwag magdala ng mga ipinagbabawal na bagay upang maiwasan ang pagbukas at pag-inspeksyon sa kanilang mga bagahe.

Sinabi ni OTS Administrator Undersecretary Gilberto DC Cruz, “Anumang paglabag sa tiwala o maling pag-uugali ay lubusang iimbestigahan, at ang mga mapapatunayang responsable ay mahaharap sa naaangkop na mga kahihinatnan, kapwa kriminal at administratibo na parusa, kung kinakailangan.

Kung mapatunayang may ilang OTS security screening officer na nanguna sa paglabag sa batas, kabilang ang pagnanakaw ng mga ari-arian o pera ng mga pasahero, tiyak na mananagot sila at sisiguraduhin na mapaparusahan ang mga nagkasala. (JOJO SADIWA)