NBI: MAY PRIMA FACIE CASE KAY SARA!

INIHAYAG ng House prosecution panel nitong Lunes sa Senado, na nagsisilbing impeachment court, na nakakita ang National Bureau of Investigation (NBI) ng ‘prima facie’ evidence, na may tinawag nitong “reasonable certainty of conviction,” laban kay Vice President Sara Z. Duterte kaugnay ng kanyang mga pampublikong pahayag na naglalaman ng pagbabanta laban kina Pangulong Ferdinand Marcos, Jr., First Lady Liza Araneta-Marcos, at dating Speaker Ferdinand Martin G. Romualdez.

Sa pagharap bilang testigo, sinabi ni Atty. Jeremy C. Lotoc, regional director ng NBI at dating hepe ng Cybercrime Division nito, ang naging resulta ng imbestigasyon ng ahensya sa mga pahayag ni Duterte at ang mga natuklasan matapos suriin ang mga nakalap na ebidensya.

Sa pagtatanong ni Senate Impeachment Court Presiding Officer, Senador Francis “Chiz” Escudero, kinumpirma ni Lotoc na may sapat na batayan ang NBI upang magsampa ng kasong kriminal laban sa Bise Presidente dahil sa ‘grave threats’ at ‘inciting to sedition’.

Ipinaliwanag ni Lotoc na ang naging pasya ng NBI ay nakabatay sa prima facie evidence na may “reasonable certainty of conviction,” na aniya’y siyang legal na pamantayan bago maisampa ang isang kasong kriminal.

Tinanong ni Escudero si Lotoc:

“Batay sa inyong imbestigasyon, mayroon bang sapat na batayan upang magsampa ng kasong kriminal, batay lamang sa prima facie evidence at hindi sa usapin kung tunay ngang nagkasala ang Bise Presidente, dahil ang korte lamang ang maaaring magpasya nito?”

Sumagot si Lotoc:

“Opo, Your Honor. Batay sa aming mga natuklasan, naniniwala kami na nagawa ng Bise Presidente ang mga krimeng grave threats at inciting to sedition.”

Muling nagtanong si Escudero:

“Sa usapin ng pagtugon sa rekisito ng prima facie evidence na sapat upang makapagsampa ng kaso?”

Tumugon si Lotoc:

“Prima facie evidence with reasonable certainty of conviction.”

Sinundan ito ni Escudero:

“Iyan ang mas kumpletong paglalarawan ng pamantayang dapat matugunan bago makapagsampa ng kaso?”

Agad namang sumagot si Lotoc:

“Opo, Your Honor. Opo.”