Ruru Madrid aminadong nagkasala kay Bianca Umali

By Anne Venancio

Nilinaw ni Ruru Madrid ang naging pahayag niya tungkol sa kasabihang “Once a cheater, always a cheater,” na naging usap-usapan kamakailan. Sa panayam niya kay Boy Abunda sa Fast Talk with Boy Abunda, iginiit ng Kapuso Primetime Action Hero na hindi niya ipinagtatanggol o kinukunsinti ang cheating. Aniya, naniniwala lamang siya na may kakayahang magbago ang isang tao kung taos-puso itong nagsisisi at handang ituwid ang kanyang pagkakamali.

Inamin din ni Ruru na noong 20 taong gulang pa lamang siya ay nagkamali siya sa relasyon nila ni Bianca Umali. Ayon sa aktor, ang walong buwang paghihiwalay nila ang nagsilbing pinakamahalagang aral sa kanyang buhay. Nagpapasalamat siya dahil pinili siyang patawarin ni Bianca at muling pagkatiwalaan.

Para kay Ruru, ang pagtataksil ay isang desisyong ginagawa ng tao, kaya responsibilidad din ng bawat isa ang manatiling tapat sa minamahal. Sa kabila ng mga tukso sa industriya, sinabi niyang pinipili niyang manalangin at alalahanin ang mga natutunan niya sa nakaraan. Para sa aktor, ang tunay na pagbabago ay nagsisimula sa pag-amin ng pagkakamali at pagpiling maging mas mabuting partner araw-araw.