Alden Richards nililigawan si Nadine Lustre

By Anne Venancio

Mas lalo pang umiinit ang kilig sa Love, Siargao habang unti-unting umuusad ang relasyon ng mga karakter nina Alden Richards at Nadine Lustre. Mula sa pagiging magkaibigan, tila handa nang dalhin ni Jao ang kanilang samahan sa mas seryosong level.

Sa teaser ng mga susunod na episode, makikitang sisimulan na ni Jao ang panliligaw kay Kara. Isa sa mga sweet moments na ikinatuwa ng viewers ang pagbibigay niya ng bulaklak “just because,” na lalong nagpasaya sa mga sumusubaybay sa kanilang kuwento. Kasabay nito, magkakaroon din ng selebrasyon para sa anniversary ng Katig, na inaasahang magdadala pa ng mas maraming nakakakilig na eksena.

Agad namang bumuhos ang positibong reaksyon ng fans sa social media. Marami ang nagsabing swak ang chemistry nina Alden at Nadine at bagay na bagay sa kanila ang friends-to-lovers storyline. Ayon sa ilang netizens, natural at nakakagaan panoorin ang bawat eksena ng dalawa, kaya lalo silang nae-excite sa mga susunod na kabanata ng serye.

Sa patuloy na pag-usad ng kuwento, inaabangan ngayon ng viewers kung tuluyan nang aamin si Kara sa tunay niyang nararamdaman para kay Jao. Kung pagbabasehan ang reaksiyon ng fans, mukhang mas marami pang kilig ang nakalaan sa tambalan ng dalawa.

Mapapanood ang Love, Siargao, hatid ng Viu Philippines, Viva Entertainment, at GMA Network, tuwing Biyernes at Sabado, alas-6 ng gabi sa Viu Philippines.