Irregularidad sa pag-angkat ng mga sasakyan, maaaring mabunyag sa pagtutulungan ng LTO at BOC

Minsan, ang isang kaduda-dudang rehistro ng sasakyan ay maaaring magbukas ng pinto sa mas malaking problema.

Mukhang ito ang nangyayari sa imbestigasyon ng Land Transportation Office (LTO) na kinasasangkutan ng isang Porsche 918 Spyder.

Ang nagsimula sa isang umano’y hindi awtorisadong plaka ay lumawak na ngayon sa mga katanungan tungkol sa rehistro at mga rekord ng pag-aangkat ng nasabing sasakyan.

Ang naiulat na pagkakaiba sa pagitan ng Customs entry—na tumutukoy sa sasakyan bilang isang brand-new na Porsche Boxster—at ng mga dokumentong nagsasabing ito ay isang Porsche 918 Spyder, ay nangangailangan ng masusing pagsusuri.

Dito nagiging mahalaga ang lumalakas na pagtutulungan sa pagitan ng LTO at ng Bureau of Customs (BOC).

Nararapat kilalanin ang pagsisikap ni LTO Assistant Secretary Markus Lacanilao sa pagtugis sa usaping ito nang higit pa sa isyu ng plaka.

Ang kanyang mga naunang natuklasan hinggil sa kaduda-dudang rehistrasyon ng mga inangkat at mamahaling sasakyan ay lalong nagbibigay-halaga sa napapanahong koordinasyon ngayon ng LTO at BOC.

Sa panig naman ng Customs, puspusan ang pagkilos ni Commissioner Ariel Nepomuceno sa pagtugon sa mga problema—mula sa smuggling at maling deklarasyon (misdeclaration) hanggang sa iba pang mga modus na maaaring magkait sa gobyerno ng kinakailangang kita.

Hindi lamang itinatago sa ilalim ng rug ang mga problema; ang mga ito ay iniimbestigahan at tinutugunan.

Isa pang mahalagang tauhan na makatutulong sa pagsubaybay sa daloy ng pera ay si Assistant Commissioner Atty. Philip Vincent “Jet” Maronilla, ang pinuno ng Post Clearance Audit Group (PCAG) ng BOC.

Kung mapapatunayan ang mga pagkakaiba o iregularidad, maaaring suriin ng PCAG kung tama ang deklarasyon, tamang halaga (valuation) at pagtatasa (assessment) ng mga kaukulang buwis at taripa para sa sasakyan.

Maaari nitong matukoy kung may nawalang kita ang gobyerno at kung may mga katulad na iregularidad sa iba pang mga transaksyon sa pag-aangkat.

Dito nagiging makapangyarihan ang pagtutulungan ng LTO at BOC.

Hawak ng LTO ang rekord ng rehistrasyon. Hawak naman ng BOC ang rekord ng pag-aangkat, valuation, at kita. Kapag pinagkumpara ang dalawa, mas mahirap nang itago ang mga iregularidad.

At ang layunin ay dapat humigit pa sa isang Porsche lamang.

Kung mapapatunayang bahagi ng mas malawak na problema ang mga kaduda-dudang rehistrasyon ng mga inangkat at mamahaling sasakyan, dapat tukuyin ng mga ahensya ang mga butas sa sistema, alamin kung sino ang maaaring responsable, bawiin ang nararapat na kita, at pigilan ang pag-uulit ng ganitong modus.

Hindi lamang ito tungkol sa pagpapatupad ng mga tuntunin sa rehistrasyon. Tungkol din ito sa pangangalaga sa kita ng gobyerno.

Samakatuwid, ang imbestigasyon sa Porsche 918 ay maaaring maging pagkakataon para sa lubhang kinakailangang paglilinis sa sistema ng rehistrasyon ng mga inangkat na sasakyan. Sa pagtutulak ni Lacanilao sa panig ng LTO, pagsuporta ni Nepomuceno sa mas mahigpit na pagpapatupad ng mga patakaran ng Customs, at pagsubaybay ng post-clearance audit team ni Maronilla sa daloy ng kita, nasa tamang mga tao ang pamahalaan upang suriin ang iba’t ibang bahagi ng iisang usapin.

Dapat nang asahan ng publiko ang isang bagay: ang pagtuklas sa katotohanan, pagtugon sa mga butas sa sistema, at pagtiyak na makokolekta ang bawat pisong nararapat para sa pamahalaan. (BONG SON)