P7.1-M KUSH, LIQUID SHABU NASABAT SA NAIA

Nasabat ng mga awtoridad ang 4,746 gramo ng pinaghihinalaang high-grade marijuana o “kush” na tinatayang nagkakahalaga ng ₱7.119 milyon.

Natuklasan din ang 20 tuwalya at 20 duvet na pinaghihinalaang naglalaman ng likidong methamphetamine o shabu.

Isinailalim sa pagsusuri sa laboratoryo ng Philippine Drug Enforcement Agency (PDEA) ang mga sample mula sa pinaghihinalaang shabu, high-grade marijuana at liquid methamphetamine. Nagpositibo ang mga ito sa methamphetamine hydrochloride at cannabis.

Isinagawa ang operasyon sa pamamagitan ng koordinasyon ng PDEA, Customs Intelligence and Investigation Service (CIIS), Customs Anti-Illegal Drug Task Force (CAIDTF), Enforcement and Security Service (ESS), X-Ray Inspection Project (XIP), NAIA Inter-Agency Drug Interdiction Task Group (NAIA-IADITG), at iba pang kinauukulang awtoridad.

Binigyang-diin ni Bureau of Customs (BOC) Commissioner Ariel F. Nepomuceno na ipinakikita ng pagkakasabat ang mahalagang papel ng paggamit ng intelligence-driven profiling, X-ray screening, at mahigpit na koordinasyon ng mga ahensya sa pagpigil sa pagpasok ng ilegal na droga sa bansa.

“Hindi natin hahayaang maging daan ang ating mga paliparan para sa pagpasok ng ilegal na droga. Sa pamamagitan ng mas mahusay na teknolohiya, mas matalas na paniktik at matatag na koordinasyon sa ating mga katuwang na ahensya, lalo nating napalalakas ang kakayahang matukoy at mapigilan ang mga ganitong kargamento bago pa man makarating sa ating mga komunidad,” ani Nepomuceno.

Binigyang-diin din ni BOC-NAIA District Collector Atty. Yasmin O. Mapa ang patuloy na pagbabantay ng Port sa pagsusuri ng mga kargamento at pagpapalakas ng koordinasyon sa mga katuwang na ahensya upang maiwasan ang mga tangkang pagpupuslit ng ilegal na droga sa pamamagitan ng pangunahing pandaigdigang gateway ng bansa.

Alinsunod sa direktiba ni Pangulong Ferdinand R. Marcos Jr. na paigtingin ang kampanya laban sa ilegal na droga at pagpupuslit, patuloy na pinalalakas ng BOC, sa ilalim ng pamumuno ni Commissioner Nepomuceno, ang seguridad sa mga hangganan sa pamamagitan ng pinahusay na paniktik, teknolohiya at koordinasyon ng mga ahensya.(BP)