2 LUPAIN NI SARA MISTULANG RESORT IIMBESTIGAHAN

SUMANG-AYON nitong Lunes ang House prosecution na suriin ang mga bagong impormasyong inilabas ng National Bureau of Investigation (NBI) hinggil sa mga ari-ariang iniuugnay kay Vice President Sara Z. Duterte, matapos kuwestiyunin ni Senator-Judge Erwin Tulfo kung kabilang ang mga ito sa halos P818 milyong hindi maipaliwanag na yaman na natukoy ng isang eksperto ng prosekusyon.

Sa ika-38 araw ng impeachment trial ni Duterte sa Senado, ipinakita ni Tulfo ang video mula sa press conference ng NBI noong araw ding iyon. Makikita rito ang dalawang ari-arian sa Davao na inilalarawang lupang pansakahan ngunit may mga pasilidad na kahawig ng isang resort.

Tinanong ni Tulfo si House prosecutor at Akbayan Representative Chel Diokno kung maaaring beripikahin ng prosekusyon ang mga natuklasan ng NBI batay sa Statements of Assets, Liabilities and Net Worth (SALNs) ni Duterte at iba pang rekord pinansiyal.

“Susuriin po ba ninyo ito sa susunod upang matiyak at muling beripikahin kung tama ang imbestigasyon ng NBI?”, tanong ni Tulfo.

“Opo, gagawin po namin iyan, Your Honor,” sagot ni Diokno.

Nauna rito, tinanong ni Tulfo ang forensic accounting expert at abogado na si Alexander Cabrera kung naisama na sa kaniyang natuklasang P817.87 milyong hindi maipaliwanag na yaman na kinasasangkutan ni Duterte at ng kaniyang asawang si Atty. Manases “Mans” Carpio ang mga naturang ari-arian.

“Ang tanong ko po, kasama ho kaya ito sa P817 milyon na undeclared wealth po ng Bise Presidente?”, tanong ni Tulfo.

Ayon kay Cabrera, hindi niya agad matitiyak kung naisama na sa kaniyang pagsusuri ang mga ari-arian hangga’t hindi niya nakikita ang mga titulo ng lupa at iba pang kaugnay na dokumento.

“Kailangan ko pong makita ang TCT, ang address, at ang sukat sa metro kuwadrado upang malaman kung pareho ang mga ito,” paliwanag ni Cabrera, na tumutukoy sa Transfer Certificate of Title (TCT).

Napansin din ni Cabrera na tila may mataas na halaga ang isa sa mga ari-ariang ipinakita sa video dahil mayroon itong dalawang swimming pool. Gayunman, iginiit niyang kailangan parin itong beripikahin.

Nang tanungin kung kasama ang mga ari-arian sa kaniyang P817.87 milyong kalkulasyon, sinabi ni Cabrera na hindi siya nakatitiyak kung naitala na ang mga ito sa kaniyang ulat.

Ipinaalam naman ni Diokno sa impeachment court na may kopya ang prosekusyon ng mga SALN ni Duterte, na naglalaman ng mga detalye tungkol sa mga real property na idineklara nito.

Nagtaas din ng mga katanungan si Senate impeachment court Presiding Officer Francis “Chiz” Escudero tungkol sa paraan ng pagtatakda ng halaga ng mga ari-arian sa SALN. Aniya, karaniwang nakatala sa deklarasyon ang halaga noong binili ang ari-arian, sa halip na ang kasalukuyan nitong patas na halaga sa merkado.

Itinuro ni Escudero na ang mga pagpapagawa at pagpapahusay sa isang ari-arian ay maaaring magdagdag sa net worth ng isang tao kahit hindi hiwalay na nakatala ang mga ito sa SALN.

“Kung hindi dineklara ang mga pagpapahusay na iyon, posibleng kasama ang mga ito sa net worth ng isang tao pero hindi nakasaad sa SALN. Tama po?” tanong ni Escudero.

“Tama po,” tugon ni Cabrera.

Binigyang-diin ng palitan ng mga tanong at sagot ang pangangailangang suriin ang mga titulo ng lupa, halaga ng pagkakabili at iba pang dokumento upang matukoy kung wastong naideklara ang mga ari-ariang natukoy ng NBI at kung naisama na ang mga ito sa forensic report ni Cabrera.

Nauna nang natukoy ni Cabrera ang P817.87 milyong hindi maipaliwanag na yaman na iniuugnay kina Duterte at Carpio mula 2022 hanggang 2025, batay sa mga nakalap na rekord sa bangko, buwis, insurance, ari-arian at mga korporasyon.

Bahagi ang kaniyang mga natuklasan ng ebidensiyang iniharap ng House prosecution sa ilalim ng Article II ng impeachment complaint laban kay Duterte, na tumatalakay sa mga alegasyon ng hindi maipaliwanag na yaman at paglabag sa mga kinakailangan sa deklarasyon ng SALN.

Sa ngayon, kailangan pang beripikahin kung hindi naideklara ang mga ari-ariang natukoy ng NBI o kung may karagdagang hindi maipaliwanag na yaman na hindi pa kasama sa naunang kalkulasyon.