P1-B project request ni Sen. Estrada isiniwalat ni Bonoan

IBINUNYAG ni dating DPWH Secretary Manuel Bonoan na humiling umano si Senador Jinggoy Estrada ng P1 bilyong halaga ng mga proyekto para maisama sa 2025 national budget sa pamamagitan ni dating Department of Public Works and Highways (DPWH) Undersecretary Roberto Bernardo.

Sinabi ito ni Bonoan sa pagdinig ng Sandiganbayan Fifth Division nitong Martes, Oktubre 27, kaugnay ng petisyon para sa piyansa ni Estrada sa kinakaharap nitong P573 milyong plunder case.

Ayon kay Bonoan, unang inirekomendang isama sa panukalang budget ang P500 milyong halaga ng mga proyekto bago humiling si Bernardo ng karagdagang P500 milyon dahil Senate President Pro Tempore na noon si Estrada.

Pero sa isang bilyong pisong kahilingan, P700 milyong lamang ang naaprubahan sa 2025 national budget.

Sa pagtatanong naman ng abogado ni Estrada, inamin ni Bonoan na hindi personal na humiling sa kanya ang senador at wala ring lagda nito ang listahan ng mga proyekto.

Batay lamang aniya sa impormasyong ibinigay sa kaniya ni Bernardo ang naturang kahilingan.

Bukod dito, sinabi rin ni Bonoan na may hiwalay pang P7.4 bilyong halaga ng mga proyektong iminungkahi ni Estrada at P475 milyong pisong proyekto kasama ang isang miyembro ng Kamara na kapwa naaprubahan sa 2025 national budget.