𝐒𝐞𝐧𝐚𝐝𝐨 𝐢𝐢𝐦𝐛𝐞𝐬𝐭𝐢𝐠𝐚𝐡𝐚𝐧 𝐤𝐨𝐫𝐚𝐩𝐬𝐲𝐨𝐧 𝐬𝐚 𝐏𝐡𝐢𝐥𝐇𝐞𝐚𝐥𝐭𝐡

Sinabi ni Senator Panfilo Lacson na inihahanda na niya ang resolusyon para masilip muli ng senado ang isyu ng korapsyon sa Philhealth matapos napaulat ang pagbibitiw ng dalawa hanggang tatlong matataas na opisyal ng naturang ahensya.
Ayon kay Lacson, matagal narin nilang napapag-usapan ni Senate President Vicente Sotto III at ng majority bloc senators ang mga katiwalian at kapalpakan sa Philhealth.
Aniya ang sigawan na naganap sa virtual meeting ng mga matataas na opisyal ng Philhealth ay nag-ugat sa halos P1 bilyon halaga ng mga kuwestiyonableng transaksyon kasama na ang P98 milyon overprice procurement.
Nais ni Lacson na magkaroon ng Senate Committee of the Whole inquiry at aniya nagpahiwatig na si Sotto na mapapabilang ito sa priority agenda sa pagbubukas muli ng sesyon ng Senado sa susunod na linggo.
“The COVID-19 crisis makes it more disgusting and abominable. Needless to say, there is urgency that the Senate has to act on the matter immediately,” sabi ni Lacson.
Nabanggit ng senador na ang mga nabanggit na halaga ay base sa internal audit report ng Philhealth. (𝑷𝑻𝑭 𝒕𝒆𝒂𝒎)