TAKBUHIN NG HUSTISYA

MAPALAD ang mga nasumpungan dahil may anim na taong kaginhawahan sa taong naninilbihan sa pamahalaan. Mapalad dahil mabibigyan pagkakataon na magpakita ng gilas at kaalaman na kailangan sa paglilingkod sa sarili este sa bayan. Kalakip ng paglilingkod ang ilang prebilihiyo na matatamo sa pwestong tangan, tulad ng mga programang may pakinabang kuno ang bayan higit ang sarili. Sa pagpasok ni president-elect Boy Pektus may mga pangalan nang lumutang sa posisyon sa mga kagawaran. Ito ang mga kalihim sa lahat ng bagay sa kagawarang titimunan.

Iilan pangalan ang bago sa pandinig, may kilala ngunit bago sa gawaing papasukan. At re-cycled ang karamihang pangalang na dati ng nanungkulan sa iba’t – ibang kapasidad sa loob ng gobyerno. Maganda kuno ang lineup ng mga kalihim na itinalaga, hindi na kailangan ng isang daang araw na honeymoon period sa papasok na administrasyon sa halip kailangan ng magtrabaho sa dami ng dapat ayusin. Sa pagtatasa sa papaalis na administrasyon, 70 ang gradong dapat dahil sa bigat ng usapin na kakargahin ni Mang Juan. Sa totoo lang, wala sa ayos ang patakbo ni Totoy Kulambo sa gobyerno higit sa paggagawad ng katarungan sa mga biktima ng maraming laban na isinulong.

Ang maraming laban na sinuong ng bayan sa administrasyon ni TK, labis-labis na bangungot na inabot ng pamilya ni Mang Juan higit ang mga biktima na hanggang ngayon katarungan ang sigaw. Marami ang hindi umuusad ang buhay dahil hindi nakamit ang katarungan sa pagkawala ng mahal sa buhay, paghandusay ng katawan sa kalye at mga mapalad na nabuhay ngunit alang kasong hinaharap. Nariyan ang mga katutubong napaalis sa tinubuang lupa sa hinalang makakaliwa ang tindig. Mga batang nawalan ng paaralan dahil sa duda na ang mga tagapagturo’y nagtutulak ng pabagsakin ang pamahalaan.

Nariyan ang panggigipit at pagpipiit sa dating kalihim ng kagawaran ng katarungan na hanggang sa kasalukuya’y humihimas ng rehas dahil sa gawa-gawang usapin na pinabulaanan ng mga saksi. Ang mga kaganapan sa itaas ay masasabing tuwiran sa paglabag sa proseso ng katarungan. Ito rin ba ang takbuhin ng hustisya sa bansa sa paparating na pamahalaan? May aasahan bang pagbabago sa paggawad ng katarungan sa lahat ng Pinoy sa ngalan ng pagkakaisa at hindi iisahan?

Sa tanong sa itaas, inaasahan na titino ang hustisya sa bansa dahil batid nito mailap ang katarungan sa mga taong kalaban ng pamahalaan. Batid din nito na ang hustisya’y nakakamit hindi man sa mabilisang panahon ngunit mananaig ang isang katotohanan takpan ng milyon milyon kasinungalingan. Silipin ang usapin ni Sen5, nariyan na ang mga nag-atrasang testigo na nagpahayag na may brasohan ginawa sa mga sanaysay na nilagdaan upang mabaon sa kaso si Sen5. At sa pag-atras ng mga saksi, inaasahan ang mabilis na pagpapalabas ng kautusan upang palayain ang senadora. Ang gawa-gawang patotoo kuno sa mga akusasyon ang ginamit na batayan sa halos limang taon na pagkakapiit, panahon para ito palayain. At ang kasong ito ang maaaring gawing barometro kung paano tatakbo ang hustisya sa pamahalaan ni Boy Pektus. Ang mabilis na review at kaukulang aksyon ang inaasahan para sa umiiral na katarungan sa bansa.

Sa papasok na pamahalaan, umasa na maging mapagmatyag ang bayan lalo sa paggagawad ng katarungan para sa lahat. Inaasahan na makakabalik ang mga katutubong itinaboy palabas ng kanilang pamayanang kinagisnan. Ang pagpapabalik sa ancestral domain ang magandang regalo na magagawa sa mga katutubo, at ito ang tamang hakbang sa tunay na pagkakaisa. Ang pagtitimon sa gobyerno na may pagtatama sa nakaraang ang susi sa pagkakaisang isinusulong. Hindi minamadali ang katarungan ngunit kung maibibigay ito sa mga pinagkaitan sa madaling panahon ang inaasam. Walang kinikilingan at ang hustisyang tama ang paiiralin sa bansa, maaasahan ba Bondying ?

Sa kabilang banda ng hustisya, inaasahan na mabibigyan ng katarungan ang mga biktima ng EJK, na hanggang ngayo’y humihingi ng katarungan. Nariyan ang tulad ni Aling Naneth na biktima ang anak ng pagpatay dahil sa ito ang inabutan ng kapulisan sa kanilang lugar. Hindi naging mapalad ang anak ni Aling Naneth, sorry na lang. Hindi umusad ang usapin nito sa hustisya, gayong batid sa ibaba ang mga salarin ngunit hindi mainguso dahil sa takot na balikan. Marami ang ganitong kaso na mailap ang katarungang, sa halip takot ang nangingibabaw sa iba pang kapamilya kung ipupursige.

Samantala, sa pag inog ng usapin sa EJK, inaasahan na makikiisa si Boy Pektus sa imbestigasyon hinggil sa kaso ni Totoy Kulambo na isinampa sa ICC. Sa ngalan ng katarungan, ang lumabas ang katotohanan batay sa pag-uusisa ang magpapatahimik sa mga kaluluwa ng mga biktima ng EJK. Walang nagsabing guilty o not guilty ngunit ang paglabas ng katotohanan batay sa makakalap na datos ang tama. At umaasa na ang hustisyang matagal na naisantabi’y magiging kaganapan sa panahon ng pamamahala ni Boy Pektus.

At sa huli, inaasahan na magkakaroon ng linaw ang usapin na kinakaharap ng pamilya ni Boy Pektus. Positibo o negatibo ang kalalabasan, ang patas na mga pagdinig ang inaasahan at handang tangapin kahit may kasakitan sa puso. Dahil ang mahalaga’y maibigay ang hatol kahit sino ang may sala, at ito’y tunay na ikinagagalak. Hindi inaalis ang legal na compromise hanggang sa abutin ang pasya kung paano isasagawa ang napagkasunduan. Hindi umaasa na magiging pabor sa bayan ang magagawad na desisyon ngunit ang nakitang walang pagtutol ang pamilya ni Boy Pektus sa gagawin ang mahalaga para sa bayan. Sapat na sa bayan na pumaloob ito sa tamang proseso kahit ano ang kalalabasan. Siyempre iba kung may pag-amin sa nagawang kasalanan at pagbalik sa pamahalaan ng kung ano ang dapat ibalik.

Sa totoo lang, kathang isip ang paglalahad ng positibong scenario sa itaas. Hindi inaasahan na magiging patas ang kalakaran ng hustisya sa bansa sa kadahilanan na hindi pa man tuwiran na nakaupo ang pamahalaan ni Boy Pektus nariyan na ang pahiwatig ng mga uupo na gagawin ang lahat para sa kagalingan ng bansa. Batid ng bayan na sanay sumakay ng tsubibo ang mga ito at ang gamit na pananalita’y nagpapahilot sa wisyo ni Mang Juan. Ang takbuhin ng hustisya’y tungo sa kung sino ang nasasalang. Walang sisinuhin kung nasa kabilang panig ng laban at hustisya ang dapat makamit ng bayan. Ngunit hindi sa Inuteam na ang takbuhin ng hustisya’y sa kabutihan ng kaisa at nag iisa. Huwag magmadali Boy Pektus, ang 36 na taon ng pagtitiis ay mababago sa anim na taon pamamalakad. At kung palarin baka tumagal pa tulad ng ama…

Maraming Salamat po!!!