INGATAN ANG SARILI

SA ikawalong araw, namahinga si Boy Pektus bilang punong tagapagpaganap sa diwa ng isang antigen test na nagpositibo ito sa C19. Ito ang ikalawang pagkakataon na nagkaroon ito ng C19, unang nagkaroon ito ng C19 ng pumunta sa bansa ng Espanya na nagpahiga sa kanya sa maraming araw bago pa man maghain ng kandidatura sa pagkapangulo ng bansa. At muling nagbalik ang sakit na dahilan o kailangang umiwas ito sa ibang tao ng hindi makahawa o makapaglipat ng sakit.

Simple ang pahayag ng troll queen na kailangang mag isolate si Boy Pektus. Ngunit sa paglipas ng mga araw, lumabas ito sa social media para sa isang pagpupulong sa pamamagitan ng virtual method upang masabing may kasipagan ang mamang ito sa kabila ng karamdaman nagawa pang magtrabaho sa ngalan ng serbisyo. Sa kabila ng karamdaman kailangan gumalaw ang gobyerno ng patuloy na maghatid serbisyo sa bayan. Samantala, ang pagnanasang patakbuhin ang pamahalaa’y naroon lalo na ang Kagawaran ng Kalusugan sa pagharap sa pandemya na tila manok na walang ulo .

Pumapalag ngunit walang direksyon sa nais na kaayusan ni Boy Pektus. Sa karamdamang dama sa kasalukuyan hindi pa sapat na sabihin na kailangan o dapat punuan ng isang Kalihim ang Kagawaran ng maipatupad ang nais. Ang kalusugan ang yaman ng sinuman at ang malakas na katawan ang sandata sa anumang pagsubok sa buhay. O’ kailangan ng maghanda si Inday Sapak para sa ‘di inaasahang mangyayari? Nagtatanong lang po.

Sa pagbabalik ng C19 kay Boy Pektus, magandang pigurahan ang kaganapan sa bansa ng pandemya upang makita ni Mang Juan na kailangan mag-ingat lalo sa pakikihalubilo sa mga kakilala na medyo matagal ng hindi nakita, lalo’t may ibang pakiramdam sa katawan. Nariyan ang pag-angat ng nagkakaroon ng C19 na umaabot sa mahigit 2K katao (omicron) lalo ang BA4 at BA5 variant na mabilis makahawa sa mga walang bakuna. Ang bilang na ito’y base sa datos na ibinibigay ng Kagawaran ng Kalusugan sa mga tuwirang magpa swab test at iulat sa kanila. Hindi kasama dito ang mga nakakaranas ng sintomas at nagsasarili upang malaman kung meron itong C19 na gumagamit ng anti-gen. Sa pagtataya ng ilang eksperto, asahan ang paglobo ng nagkakaroon ng C19 sa bansa sa susunod na mga araw. Maging ang OCTA Research ay naglabas ng sariling pagtaya ng pagtaas ng C19 sa buwan ng Hulyo na sumalubong kay Boy Pektus.

Sa datos ng DOH may 70M na ang nabakunahan, subalit karamihan nito’y mga working age na tumatayong taga pagdala ng C19. At halos kalahati nito ang walang booster na pagtitiyak ng immunity sa pandemya. Sa pigurang ito, tila nagtratrangko ang Kagawaran at nakalimutan ang mga bata na pinayagan ng DepEd ng F2F classes. At sa pag-uwi galing sa eskwelahan na parang manok na may pisik at lulugo-lugo ang mga ulo na may iniindang ‘di malaman kung saan nakuha. Ang kagalingan pa nito, may mga LGU ang nagmamalaki na hindi susunod sa kautusan ng pambansang pamahalaan. Habang nariyan muli ang C19, sana matuto na tayo sa nakaraan.

Sa kasalukuyan at sa darating na mga araw napaka kritikal ang sitwasyon kung saan inaasahan ang patuloy na pagtaas ng bilang ng nagkakaroon ng C19 sa bansa. Ang kaayusang ito’y tila naisantabi sa hindi pagkakaroon ng Kalihim ng Kagawaran gayong ito ang dapat inuna dahil ang bansa’y dumaan sa pandemya na mismong karanasan ni Boy Pektus. Sana’y makita na nakasalang ang kagalingan ni Mang Juan at ng pamilya nito. Kailangan kumilos punuan ang patlang ng pagpapatakbo ng Kagawaran ng Kalusugan. Tandaan, pa akyat na rin ang kaso ng mga water borne-diseases sa bansa, tulad ng dengue maging ng leptospirosis. Ang pagtutok sa sakit na mga ito’y kagyat tulad ng pangangailangan sa puno sa Kagawaran.

Huwag ipagwalang bahala ang kapakanan ni Mang Juan dahil lang sa kayo’y walang mapili o walang gustong tumanggap sa problemadong tangapan. Ang hindi pagkilos sa kritikal na panahong ito’y tila may sagutin kayo sa bayan lalo’t buhay at kabuhayan ng mamamayan ang nakasalalay. Walang halong pananakot sa halip kailangang kilusan ang sitwasyon habang bata ang panahon. Bakit walang ibig tumayo para sa kapakanan ng bayan. Bakit kung takits ang usapin, nagkakandarapa at kailangan ang agarang aksyon. Kaninong interes ang isusulong sa pagkakataong ito. Bakit laging nasa isang tabi ang kagalingan ni Mang Juan?

Hindi pipilitin si Boy Pektus na pumili at magtalaga ng bagong Kalihim, ngunit nariyan ang mga kasalukuyan o dating opisyal ng Kagawaran na maaaring tumao at mag maneho ng Kagawaran. Maraming gagawin at huwag ipagwalang bahala ang kalusugan ng bayan dahil ba sa kayo’y bago sa pamunuan. Ang makadama ang 31M bumoto kay Boy Pektus at maging ang katulad ni Mang Juan ng pagmamalasakit kahit sa dalawang linggong pag-upo sa kapangyariha’y sapat ng masasabi na para kayo sa bayan. Ang lahat bang paglapit na naganap sa nakaraan ay pawang pakitang boto at walang puwang si Mang Juan sa sinuman sa inyo. Huwag alisin sa inyong pandamdam at sariling karanasan na sa panahon ng pagbangon sa anuman kasadlakan ang madama na may kasama at may tumitingin sa kalagaya’y kailangan sa kasalukuyang panahon. Pagsabayin ang programang pangkalusugan at kabuhayan sa pagbangon ng bayan. Dahil ang malusog na mamamayan ang magdadala ng kaunlaran ng lahat.

Sa huli, Mang Juan huwag kalimutan na ingatan ang sarili dahil walang maasahang malasakit ang naghihintay sa iyo mula sa pamahalaan. Sa katunayan, walang naitatalagang Kalihim sa Kagawaran ng Kalusugan na kritikal sa kasalukuyang panahon. O’ baka ibig din maging Kalihim ng Kagawaran ng mas maraming media exposure at mapabilis ang paglilihis ng kasaysayan at paglilinis ng ngalan. O baka walang ibig kumuhang Doktor na nasa tamang isip at kalusugan. Kaya Mang Juan, ingatan ang sarili maging ang mga mahal sa buhay dahil mahirap ang magkasakit lalo sa tulad mong isang kahig isang tuka. Maghugas ng kamay, laging magsuot ng face mask kung lalabas ng bahay, at panatiliing malinis ang kapaligiran kontra sa lamok, daga at ibang taga pagdala ng sakit. At kung pwedeng magpabakuna kontra C19, huwag mag-atubiling magpaturok. Unahin ang kaligtasan mo at ng pamilya ng maiwasan ang paglabas ng iyong kaperahan. Huwag ng magpatumpik tumpik sa pangangailangang pang kalusugan at hindi uunahin ng pamahalaan na iyong binoto ang kapakanan ng bayan dahil ang kaperahan ang una bago ang mamamayan. Ang maperang lukbutan ang kinikilala ng bagong pamahalaan na nakita na sa isang magarbong piging na ginanap kamakailan sa loob ng Balite ng Malacanan.

Maraming Salamat po!!!