BABAGUHIN ANG KASAYSAYAN

WALA ang bakas ng nakaraang kaugalian sa kasalukuyang panahon. Nasanay sa mabilis na kaganapan ang kabataan ngayon, ang resulta’y paglimot sa magagandang kaugalian at maging ng kasaysayan. Maging sa magsising irog, nariyan na nagkakilala sa umaga at sa kinahapunan mag steady na. Hirap tanggapin ng may kaidaran ang ganitong kaayusan subalit hindi mapigilan at puro pagsasabi na lang na mag-ingat at huwag magmadali sa anuman.

Sa pagbabago ng kaugalian, hindi mapigilan ng marami na gumalaw ayon sa dikta ng panahon. Ang matangay ng bandwagon lalo sa mga batang gumagamit ng computer na ito ang kaharapin sa maghapon. Nariyan maging ang mga paaralan na pumaloob sa panahon ng mabilis na kalakaran pang edukasyon ang napilitang magtakda ng mga aralin gamit ang computer. At ito ang ‘di mapigilang panahon na ang walang kaalaman sa gamit na ito’y etsapwera sa kinabukasan.

Sa isang piging na dinaluhan, namangha ang Batingaw sa mga nakausap na mga kaibigan na nagbigay ng punto hingil sa uri ng mga kabataan ngayon at komunikasyong ginagamit. Nariyan ang tinuran ng pagka umay ng mga ito na magbasa ng mga nobela, o maging ng mga kasaysayan ng lipunan. Nawala ang pagkagiliw ng kabataan sa pagbabasa ng mga libro hinggil sa mga kasaysayan ng pagbangon ng lipunan. Bihira ang kabataan na magbabangit o magtatanong kung ano ba ang mga aral ng nakaraan. Hindi maka pagbukas ng usapin ang tulad ni Mang Juan hinggil sa takbo ng kasaysayan dahil baka iwan ng kabatang makakausap. Sa tindig ng pagtatasa ng kabataan sa ngayong panahon, tila kampante na ito sa kasalukuyan kaganapan at walang pake sa nakaraan.

At nariyan ang mga pagtatangka ng ilan na pilit binabago ang pagtingin sa nakaraan. Nawala ang pagkahilig ng kabataan na buksan ang mga aklat upang makapangalap ng kaalaman sa anumang usapin na mapag-usapan. Nakakalungkot ang ganitong kaayusan lalo’t kilala ang bansa sa mga mahuhusay na manunulat sa anumang larangan. Hindi kapos ang bansa sa mga malikhaing Pilipino, marami ito at matingkad ang mga ngalan.

Pansinin ang ilang kaganapan sa bansa na naging matingkad sa mga nakalipas na panahon. Nariyan ang social media na patuloy na namamayagpag sa dami ng tumatangkilik dito. At ito ang isa sa pangunahing pinagkukunan ng mga balita sa bansa. Hindi maitatatwa na ang mga balitang makikita sa TV, radio maging sa mga diyaryo’y unang nasisilip sa social media at parang ito ang una bago ang iba. Ang masakit nito, walang mahabang paglalarawan ng kung ano ang naganap o nangyari sa isang sitwasyon. Bahala na ang nanonood kung paano ito pinoproseso dahil ang mahalaga naipaabot ito ng may kabilisan. At kung sino at kanino galing ang impormasyon ‘di na mahalaga, ang ipaabot sa iyo ang nangyari’y sapat na. Walang tama o mali, ang dami ng sumilip, naglike at nagcomment sa pagkatapos ay sapat na.

Sa totoo lang, may pagkahilig ang Pilipino na nakikinig sa istorya sa halip na magbasa. Nasisiyahan itong makinig ng mga balita hinggil sa pangyayari lalo’t may pagkadrama o dagdag na pagarte habang nagsasalita. Ang mga usaping may mga larawan o footage na nagsasabi ng kaganapan ang tangkilikin at paniniwalaan.

Kahit batid sa social media na may magagaling mag-edit o splice ng mga photo o visual footage na inupload para tangkilikin. Hindi sinasabing mali ngunit bihira sa Pinoy ang mag validate ng mga impormasyong napapanood o nakikita. At sa kaayusang ito malinaw na lumalayo na ang Pinoy na alamin ang nasa likod ng mga pangyayari. At ito ang pangunahing rason kung bakit dumalang ang mga Pinoy na nagbabasa at nagsusuri.

Pansin ba ng mga nasa social media ang pagdami ng maiikling salita na tumutukoy sa kung sino. O nariyan na ang mga quotation na sinabi ito ng kung sino. May karamihan ang mga ito at may mga pumuputok sa dami ang sumisilip at may ibig. Palasak ito sa kasalukuyan na kinahihiligan ng mga gumagamit ng facebook. At halos pinaniniwalaan na ito ng marami. Maging ang mga nasabing nadamputan ng pahayag ay inaangkin kung positibo ang dating nito. At negatibo ang maraming komentaryo’y tiyak na lilitaw ang nagsabi na hindi ito galing sa kanya o tama ang pagkakapulot ng sinabi. At kung maayos naman tiyak na tatahimik at baka may padala pang regalo sa naglagay sa social media, siyempre pa, pogi points ata.

Malaking kapalaran ngayon sa darating na pamahalaan ang may kaalaman sa troll at vloging lalo’t dala ang ngalan ni Boy Pektus. Malamang na lalapit sa iyo ang grasya at makatangap ng mahalagang pwesto sa pamahalaan, pagiging Press Secretary ng papasok na pangulo. Kilala ang mapalad na babaeng ito na nagtulak ng kandidatura ni Boy Pektus sa paggamit ng trolls at vlog, hayun nakakuha ng premyo. At galing mismo kay Boy Pektus, ipagpapatuloy ang info drive ng trolls at vlogs upang sa maraming Pilipino ang mapaalam ang programa ng pamahalaan.

Tunay na binubulag ang Pilipino sa balitang hindi kumpleto sa laman, at ang nais lamang na ipaabot ang ilalabas. Hindi kailangang ng talastasan ang inabot ang nais ang para sa 31M ang kahalagahan at ito ang gagawin. Ang mga sinalang balita ang ipinabatid sa madla. Hindi bibigyan ng puwang ang mga pag-uusap na magpapatibay sa mga programang dapat sa bayan. Isip troll isip kokonti, salitang kokonti na hindi makikita ang buo, paano si Mang Juan na naghahanap ng maliwanag na kinabukasan.

Sa ngayon, mapapansin na bumitaw ang balana sa mahahabang babasahin o pagbabasa at nakampante sa maikling salita. At ito ang impormasyon sa kasalukuyang panahon. Sa pagsusog ni Boy Pektus sa kaayusang, tila malaki ang bentahe nito magiging madali para sa kanila na baguhin ang takbo ng kasaysayan. Nag-umpisa na ang mga trolls ni BP sa pag-upload ng mga footage na naglalaman ng maraming magagandang ginawa kuno ng magulang nito noong ito’y nakaupo sa Puno ng Balite ng Malacanan.

Ang pagtatalaga kay Zoraida na isang batikang troll ang patunay na walang hindi sasalingin upang mapaniwala ang bayan sa nagawa at gagawin ng mga hunghang. Ang paglalayo sa mga kabataan na magbasa ng mga aklat ng kasaysayan ang unang hakbang upang pagtakpan ang kasaysayan ng nakaraan. Habang sa susunod na mga panahon, asahan na ang paggamit ng mga pinagtagpi tagping impormasyon ng kagalingan ng ama ni BP. At marahil umaabot ito sa mga silid aralan upang baguhin ang kasaysayan. Nakakatiyak na mahaba ang anim na taon upang mabaluktot ang kasaysayan ng bayan. Ang mga buktot ang ikalulugod at ang mabuti ang itatakwil. Aalisin sa mga aklat o ang mga mismong aklat ang anumang binabasa ang hinggil sa nakaraan ng mga hunghang at ang mga tutol dito ang magiging tampulan ng sisi sa nakaraan.

Ang anim na taon na pinanatili ni Boy Pektus sa puno ng Balite sa Malacanan ay sapat na upang mabago ang takbo ng mga nakasulat sa kasaysayan. Ang paggamit ng trolls at vlog sa social media ang unang hakbang upang mabilog ang kaisipan ng mga Pilipino. Kasunod nito ang pag-aalis sa anumang babasahin sa social media, sa mga aklatan at anumang uri ng babasahin sa mga kaalaman hinggil sa sinapit ng bayan sa ilalim ng batas militar. At sa panghuli, ang muling pagsusulat ng kasaysayan na nagsasabi ng kabaligtaran sa kaganapan sa kasaysayan. Ang hindi matawarang paggamit ng social media ang paraan upang mabago ang pananaw ng balana sa babaguhing kasaysayan ng bayan nating pinaka mamahal…

Maraming Salamat po!!!