SIMULAN ANG PAGHAHANDA

SIMULAN ang paghahanda mga kawani ng pamahalaan, hindi magtatagal at mahaharap sa pagsubok kung saan marami sa inyo ang mawawalan ng hanapbuhay kung maipapasa sa kongreso ang panukalang batas na niluluto ng pamahalaan ni Boy Pektus. Binabalangkas ang isang panukalang batas na magbibigay kay BP ng kapangyarihan balasahin ang burukrasya ng magkaroon ng tamang dami ng kawani ang gobyerno. Inihahanda ng Department of Finance, Department of Budget and Management sa tulong ng Civil Service Commission ang panukalang batas na bawasan ang kawani sa pamahalaan ng maging epektibo ang pagbibigay serbisyo sa mamamayan. Siyempre hindi pwedeng itago ang pangunahing layunin, ang makapagtipid ang gobyerno ng bilyon – bilyong piso para sa programang inilatag ni Boy Pektus. Tila hirap ang economic team ni Boy Pektus kung paano paikutin ang walang pondong pamahalaan na namana sa walang habas na korapsyon sa panahon ng Inferior Dabaw Group.

Sa pagtaya ng DBM, aabot sa P14.8B ang matitipid ng pamahalaan taon taon kung mababawasan ang casual, contractual, at Job Order na kasalukuyang naninilbihan sa pamahalaan. Maging ang mga kawani na malapit sa edad ng magretiro’y minamataan at balak bigyan ng pakete upang mahikayat na bumitiw na rin sa serbisyo. Ang kagandahan sa binubuong panukala, hindi kasama ang mga may dalang bakal o uniform personnel, maging ang mga guro na nasa ilalim ng pamamahala ni Inday Sapak. Eh bakit may tinitingnan sa tinititigan, at bakit kailangang magbawas ng kung pagpapataas ng kabuhayan ang usapan.

Sa pagpapataas ng kabuhayan, hindi ba nararapat na bawiin ang bilyon o trilyong salapi na hindi makita sa panahon ng nakaraan na administrasyon. At bayaran ang buwis na matagal ng dapat nasa kabang bayan. Kung magagawa ito, malaking kaginhawahan ito sa gobyerno maging kay Mang Juan at mababawasan ang pag-iisip kung saan kukuha ng pantustos sa araw – araw. Sa paghahabol at maibalik ang mga salaping bayan, tiyak na gagaan ang pasanin ng bayan lalo sa mga buwis na maaaring suspendihin kahit sa maiksing panahon ng makaramdam si Mang Juan ng kaunting pakinabang sa pamahalaan.

Sa panukalang batas na ibig ng pamahalaan ni Boy Pektus, tila ibig ipasa sa Kongreso ang sisi sakaling maging negatibo ang tangap ng bayan sa gagawing right sizing kuno sa pamahalaan. Kahit naglabas na ito ng MC #01; na nagsasaad na bababa na sa pwesto ang mga political appointees ng IDG, kasama ang mga tauhan na hindi regular plantilla ang hawak sa paninilbihan sa katapusan ng Hulyo. Tila ibig makaiwas sa ngitngit ng kawani ng pamahalaan o makasalo ang kongreso kung sakaling maging batas ang panukalang batas ng right sizing. Nang sa gayon, hindi madudungisan ang dating madungis na pangalan. Mababaw ang diskarte ito ni BP at sana’y hindi mabulagan ang mga mambabatas sa kilos na ito. Malinaw na pagtatakip ito sa kahinaan ng pamahalaan sa pagpapalaganap upang mapalakas ang ekonomiya ng bansa.

Sa pagpapalaganap ng mabuting programa ng gobyerno, nariyan na nangangailangan ng mga taong tutok sa programa na magdadala maging sa liblib na lugar sa bansa. O may ibang dahilan, ang maipasok ang mga taong tumulong sa pagkakasungkit sa pwestong asam. Hindi maikakaila na nariyan na at ang bawi o bayad utang ang gagawin sa mga nagsakripisyo sa kandidatura. Sa ngalan ng pagpapalakas ng ekonomiya ng bansa, ang pagtitipid kuno sa gastusin ng bayan ang isa sa mga gagawin ng may magamit para sa pagbangon. Ang pagbabawas ng mga kawani sa pamahalaan ang isang solusyon na naisip at balak gawin ng pamahalaang ito. Kung ang raso’y para sa programang bayan bakit ang tulad ni Mang Juan ang dapat pumasan.

Sa kasalukuyan may o higit sa 178K na plantilla position ang hindi na pupunuan na nakatago sa mga opisina ng gobyerno. Ang tanong, bakit hindi punuan at kailangang magbawas sa ngalan ng right sizing na ibig ng namumuno? Oo maraming dapat buwaging opisina ng gobyerno tulad ng GCG na sinasaklaw ang mandato ng COA at CSC. Hindi makatwiran na itutok ang rightsizing sa mga rank-and-file na bumalikat sa nais ni Boy Pektus. Habang maraming position ang hindi nalalagyan ng kawani na tila gatasan ito ng puno ng mga ahensya para magkaroon ng savings at siyempre pa pogi points. O’ nariyan naman ang mga JO, Casual, Contractual na gumagawa sa position na dapat tauhan. Sa totoo lang, malaki ang tipid ng gobyerno sa pagkuha ng mga nabangit na personnel dahil hindi nito natatangap ang lahat ng mga bonuses na ibinibigay ng pamahalaan sa mga regular plantilla personnel.

Sa kilos ng pamahalaan ni Boy Pektus tila hindi pagkakaisa ang patunguhan nito sa hinaharap lalo’t puro masasakit na hakbang sa mga taong nasa mababang antas ang kabuhayan. Nariyan na ang labis labis na buwis, mataas na presyo ng bilihin at ang napipintong baklasan ng kawani sa ngalan ng pagtitipid. Magtitipid sa isang banda ngunit sa kabila’y nariyan ang baklasan at iyakan sa mga tahanan; at sa kabila ng buhay nariyan ang marangyang piging na ginawa sa loob ng Balite ng Malacanan. Nariyan si Boy Pektus na nagtrabaho ng ilang araw at pagkaraa’y lumiban na sa trabaho sa ngalan ng “ sick leave ”.

Samantala ang mga kawani ng pamahalaan na bumabaka sa gawain sa serbisyo para sa bayan ang pinagdidiskitahan at ibig alisan ng hanapbuhay. Ang maitayo ang kabuhayan ng bayan ang layon ngunit bakit kailangan may kapalit. Sadya bang walang puwang si Mang Juan sa inyo na ginagawang tagatangap ng lahat ng aberya. At sa huli’y bibitawan dahil tapos na ang pakinabang. O tunay na pansarili ang nais.

Maselan ang usapin ng kabuhayan ng bayan, ngunit kailangan pag-isipan ang nais na pagpapatupad ng tinatawag na right sizing sa pamahalaan. Dahil ang mga ito ang tuwirang lingkod bayan kahit sino ang mahalal. Marangal man ang layon, ngunit huwag isakripisyo ang kapakanan ni Mang Juan upang maka usad ang nais na programa para sa bayan. Tulad ng mga nakaraan maraming kilos ang pinagsisihan na humantong sa pagpapaalis sa lider ng pamahalaan. Sa paglilinis ng ngalan, huwag hayaan na maisantabi si Mang Juan na minsan ng nagpadapa sa mga pamahalaang ‘di bumabasa sa kaganapan. Maganda ang layunin sa bayan, tama na isama sila sa kilos, ngunit hindi ang pumasan ng sakit na madalas na ginagawa sa kanilang hanay. Nariyan na napupuno at lunod na sa hirap ng buhay, huwag hayaan na ito’y pumutok na parang bulkan. Ang mawalan ng hanapbuhay ang mga kawani sa pamahalaan o sa pribado man ay malaking usaping bayan lalo’t sa panahon na sobra ang mahal ng mga bilihin. Ang suklian ng kabutihan at ng tamang trato ang inaasahan ng mga ito sa pangulo nilang hinalal.

Huwag ipagwalang bahala. Ang mag hanap ng paraan sa pangangalap ng pondo’y kailangan, ngunit ang alisan ng hanapbuhay at kabuhayan si Mang Jua’y isang maling hakbang. Kailangan ng mabuting galaw sa lahat ng mabuting layon. Nasa tamang bilang na ang dami ng mga kawani sa pamahalaan, hayaang itong maglingkod ng tapat at ng may karangalan.

Maraming Salamat po!!