‘CREDIT CARDS’ BAGONG SISTEMA SA CONCESSIONAIRES NG NAIA TERMINALS

IPINAG-UTOS ni Manila International Airport Authority (MIAA) general Manager Cesar Chiong ang lahat ng mga concessionaires na naglilingkod sa mga pangunahing terminal ng paliparan sa Ninoy Aquino International Airport (NAIA) na magtatag ng isang sistema sa paraang matatanggap ang mga credit card.

Nabatid na si Chiong ay lumikha ng isang team na magsasagawa ng mga kinakailangang talakayan, na ang binanggit na Little Vin Vin, ang master concessionaires sa NAIA terminal 2, ay nanguna sa pagpapabuti ng kanilang sistema.

Ani Chiong, sa loob ng dalawang linggo, karamihan, kung hindi man lahat ng establisyimento sa NAIA terminal 2 ay tatanggap na ng mga credit card habang nag-direkta din siya ng tseke sa lahat ng ATM machine upang matiyak na ang mga ito ay nasa kondisyon sa lahat ng oras.

Tiniyak din nito na ang lahat ng ginagawa ng MIAA ay upang maranasan ng mga pasahero ang pinakamahusay na serbisyo lalo na sa pagsisimula ng kapaskuhan na inaasahang pagtaas ng dami ng mga pasahero.

Kaugnay nito pinayuhan niya ang mga manlalakbay na maglaan ng sapat na oras bago pumunta sa paliparan, dalawang oras bago ang nakatakdang pag-alis para sa mga domestic flight at tatlong oras para sa internasyonal.

Pinayuhan din ni Chiong ang mga pasahero na subukang magcheck-in online upang makatulong na mapagaan ang mahabang pila sa paliparan.

Dapat din aniyang tiyakin ng mga pasahero na suriin din nila ang airport terminal assignment ng kanilang flight, bago tumuloy sa airport, gayundin ang mga advisories, para sa walang problemang paglalakbay.

Sinabi naman ni MIAA senior assistant general manager Bryan Co na tinatanggap nila ang ibat-ibang feedback o reklamo sa kasikipan sa paliparan ngunit ang mahalaga ay kumilos at mapabuti ang karanasan ng mga pasahero.

Samantala, nakipagpulong si Chiong sa PNP Aviation Security Group kung saan ay inulit nito na ang pagbibigay ng seguridad sa NAIA Terminals ay ‘shared responsibility’. (JOJO SADIWA)