Ex-CA Justice kabilang sa 5-man committee na sasala sa PNP top officials

PINANGALANAN ni Department of the Interior and Local Government Secretary Benjamin Abalos Jr. si retired Justice Melchor Quirino Cabarugi Sadang bilang ika-limang personalidad na bubuo sa Committee of Five na sasala sa courtesy resignations ng mga 3rd level officials ng Philippine National Police (PNP).

Si Sadang ay dating Associate Justice ng Court of Appeals mula 2011 hanggang 2017, nagsilbi rin itong presiding judge ng Cavite Regional Trial Court (RTC) at naging law professor ng University of the East (UE).

Ayon kay Abalos, maganda na ang track record ni Justice Sadang at kilala itong may integridad.

Una nang pinangalanan ang apat na miyembro ng komite na sina Baguio City Mayor Benjamin Magalong, PNP Chief Police General Rodolfo Azurin Jr., former Defense Chief Gilbert Teodoro, at Undersecretary Isagani Neres mula sa Office of the Presidential Adviser on Military Affairs.

Ayon pa kay Abalos na agad magpupulong sa Lunes ang 5-man committee para sa gagawing vetting process ng mga koronel at heneral ng PNP na nagsumite ng courtesy resignation. (Josephine Patricio)