Matagumpay na pagdalo ni PBBM sa 42nd ASEAN Summit, pinuri ni Bong Go

Pinuri ni Senator Christopher “Bong” Go ang matagumpay na pagbisita ni Pangulong Ferdinand “Bongbong” Marcos, Jr. sa Indonesia para sa 42nd Association of Southeast Asian Nations (ASEAN) Summit simula Mayo 10 hanggang 11 sa pagsasabing isa itong magandang pagkakataon para sa Pangulo na mapalakas ng ugnayan ng Pilipinas sa mga kapitbahay na bansa.

Sa ambush interview matapos ang kanyang pagbisita sa Tondo, Manila, sinabi ni Go na ang pagdalo ni Marcos sa ASEAN Summit ay isang makabuluhang hakbang tungo sa pagtataguyod ng kooperasyong panrehiyon at pagtugon sa mga karaniwang hamon tulad ng pandemya ng COVID-19 at pagbangon ng ekonomiya.

“I fully trust President Bongbong Marcos will advance our national interest. Uunahin po niya ang interes ng ating mga kababayan. And I’m sure marami po silang pwedeng pag-usapan at makakaengganyo po ng mga investors dito sa ating bansa,” ani Go.

“‘Yan po ang trabaho ng Presidente kapag umiikot, to encourage investors and pursue the nation’s interests. Kapag maraming investors, maraming negosyo, marami pong trabaho ang maibibigay sa ating mga kababayan,” dagdag niya.

Ang ASEAN Summit ay pagtitipon ng mga pinuno mula sa mga bansang kasapi ng ASEAN at kanilang mga kasosyo sa diyalogo. Ito ay ginaganap dalawang beses sa isang taon upang talakayin ang mga isyu sa pulitika, pang-ekonomiya, at panlipunang kooperasyon, gayundin ang panrehiyong seguridad at katatagan.

Ang pagdalo ni Pangulong Marcos sa summit ay naglalayong higit na pahusayin ang papel ng Pilipinas sa rehiyon at isulong ang mas malapit na ugnayan sa mga miyembrong estado ng ASEAN.

Noong Biyernes, Mayo 12, iniulat ni Pangulong Marcos ang mga natamo mula sa kanyang pakikilahok sa ASEAN Summit.

Binigyang-diin niya ang kahalagahan ng pagtataguyod ng internasyonal na sistemang nakabatay sa mga patakaran na nagpatibay sa panrehiyong seguridad, kapayapaan at kaayusan sa rehiyon.

Nauna rito, idiniin ni Sen. Go na nasa tamang landas ang pamahalaan, sa ngayon, at inulit ang kanyang pangako sa pagsuporta sa mga programang naglalayong iangat ang mahihirap.

Sa kanyang bahagi, binigyang-diin din ni Go, bilang tagapangulo ng Senate committee on health and demography, ang kanyang suporta sa mga priority measures ng Pangulo tulad ng pagtatatag ng mas maraming specialty centers sa buong bansa.

Inihain ni Go ang Senate Bill No. 1321, o ang panukalang “Specialty Centers in Every Region Act of 2022”, na naglalayong magtatag ng mga specialty center sa mga piling Department of Health-hospital sa buong Pilipinas.

Kasama rin sa Philippine Development Plan 2023-2028, na nilagdaan ni Pangulong Marcos Jr., ang pagtatatag ng mga specialty center bilang bahagi ng kanyang health-related legislative agenda.