20 MOTOR DONASYON SA MAYNILA KONTRA KRIMEN

Tinanggap ni Manila Mayor Francisco Isko Moreno Domagoso ang donasyon na 20 motorsiklo mula sa Chiang Kai Shek College para sa Manila Police District (MPD), bilang bahagi ng pagpapalakas ng kanilang motor pool nitong Lunes, Mayo 4.
Isinagawa ang turnover sa lingguhang flag-raising ceremony sa Manila City Hall, kung saan personal na tinanggap ni MPD District Director Arnold Santiago ang mga sasakyan sa ngalan ng pulisya.
Pinangunahan ang delegasyon ng Chiang Kai Shek College nina Honorary Chairman of the Board of Trustees Mr. Johnson Tan, Treasurer Mr. Eduard Tio, Auditor Ms. Margarita Go, College President Dr. Judelio Yap, Vice President Dr. Rolance Chua, at Director for Institutional Advancement and Development Ms. Margaret Salvador.
Ayon kay Domagoso, nagdadala ang pinakahuling donasyong ito sa kabuuang bilang ng mga naibigay na motorsiklo sa humigit-kumulang 60 yunit. Aniya, patunay ito ng tuluy-tuloy na suporta ng pribadong sektor upang mapalakas ang kakayahan ng MPD sa mabilis na pagresponde at mobilidad.
Dagdag pa ng alkalde, agad na gagamitin sa operasyon ang mga motorsiklo sa ilalim ng pamumuno ni General Santiago.
“Ilalaan natin ang mga kagamitang ito upang mas epektibong makaresponde at, kung may pagkakataon, ay makaiwas sa krimen. At kung hindi man ito mapigilan, hahabulin natin sila anuman ang mangyari,” ani Domagoso.
Tiniyak din ng alkalde sa mga donor na gagamitin lamang ang mga motorsiklo para sa kapakanan ng publiko, at nagpasalamat sa Chiang Kai Shek College sa patuloy nitong pagtitiwala sa Manila Police District.
“Pumanatag kayo, sa pamumuno ni General Santiago, lubos naming gagamitin ito para sa serbisyo publiko. Maraming-maraming salamat sa inyong tiwala sa Manila Police District,” dagdag ni Isko.(BP)