PAGKAIN NA SA MESA

HINDI mabilang ang dami ng batas na magpapalakas ng ekonomiya ng bansa subalit hindi lasap ni Mang Juan ang pakinabang. Walang pagbabago ang katayuan sa kabuhayan ng karaniwang tao na pagal sa pakikinig sa pangakong napako. Hindi maramot ang Pinoy sa pagkilala sa mga lider ng bayan na nagsusulong ng kanilang interes ngunit nagagapi dahil sagka ng iilan na bumuti ang katayuan sa buhay ng nakararami. Minsang sumaya si Mang Juan ng pinangakuan ng pagbaba ng presyo ng bigas sa P20.00, ngunit heto ngawit ang panga sa pagnganga sa halos dalawang taon paghihintay ng pagbaba sa halaga ng bigas at ng iba’t – ibang bilihin. Sa katunayan, pumakabila ang regla ng presyo ng mga bilihin na sa halip na bumaba hayun parang kwitis sa bilis ng pagtaas. Hindi mahabol kahit ng sprinter ang pagtaas ng bilihin gayung kapit ng pamahalaan ang timon ng mga polisiyang pambansa.

Makailang dekada ng walang pagkilos pataas sa kabuhayan ni Mang Juan mula ng isilang hanggang sa kasalukuyan. Sa katunayan, pabawas ng pabawas ang halagang pambili ng pangangilangan sa araw-araw na bangit sa itaas na tila kwitis sa pag-alagwa paitaas ang presyo. Maraming pangulo ang nanungkulan ngunit iilan ang masasabing positibo sa sambayanan ang panunungkulan. Nariyan ang biyuda na ibig iangat ang kalagayan ng kabuhayan ng bansa ngunit naabala ng mga “coup de etat” at ng pagpapalakas ng demokrasyang ibig. Pumasok ang dating sundalo na binuksan ang bansa sa mga dayuhang mamumuhunan. Ang masakit ‘di bumaba kay Mang Juan ang pakinabang at nanatiling nganga ang kabuhayan. Sumunod ang artista pangulo na walang kaibi-kaibigan o kamag-anak subalit pumasok ang kasugalan, at sinipa sa tungkulin. Pumalit ang tusong ekonomista si “I’m Sorry” ngunit ‘di nagbago ang kabuhayan ng karaniwang tao. Patuloy ang paghihirap at parang bumbilyang kukurap-kurap ang kabuhayang tangan.

Sumunod ang anak ng namayapang biyuda at tumuon sa kagalingan ng bayan higit sa paglilinis ng pag-uugali sa kakalsadahan at inalis ang kayabangan ng wang-wang. Kahit hindi ganap na tanggap ang hakbang na pagsulong ng kabuhayan ng mamamayan, nailatag ang ilang mahalagang reporma sa pagbaba ng pakinabang ng sambayanan. Ngunit ang nailatag na sanay magpapadala sa maayos na kabuhayan ng bansa’y binalahura ng pumasok ang walang alam na pangulo na ang nais ang laban sa droga. Tumigil ang kaunlaran sa kasabay ng paghinto ng maraming hininga ng mga biktima ng karahasan ng palpak na laban sa droga. Ang malupit, naubos ang salaping iniwan ng sinundang pamahalaan na P1.0T at lumobo ang utang ng bansa mula sa P7.0T tungo sa P13.5T, na ‘di batid kung saan ginamit. At bukod sa inutang, ‘di batid kung saan napunta ang maraming donasyon sa panahon ng pandemya.

Sa kasalukuyan, pumasok ang anak ng dating diktador at tila hilong talilong si Mang Juan kung saan tutungo dahil lahat ng puntaha’y pawang pagtaas ng bilihin ang sumasalubong. Tunay na ang pagtaas ng bilihin ay kakambal ng hirap sa buhay ng karaniwang tao na ‘di dama ng puno na nakatira sa Balite ng Malacanan. Ang masakit tumataas ang smuggling ng produktong pansakahan na banta sa kabuhayan ng maraming magsasaka na nabubuhay sa pagbubungkal ng lupang tinatanim. Ang masakit tila binubungkal ang lupang paglilibingan dahil sa mahal ng bilihin. Sa totoo lang, mapalad ang mga opisyal ng bayan na nagdidil sa dami ng kaperahan galing sa pawis ni Mang Juan. Habang nganga ang bayan sa kahirapan.

Ang pagpasok ni Boy Pektus sa liderato ng bansa, tila sumpa sa karaniwang tao dahil patuloy na inilalayo ang kabuhayan sa tulad nilang ‘di mapalad . Payat na si Mang Juan at tila nababaliw si Aling Marya sa kakaisip kung paano bubuhayin ang mga anak na iyak ang libangan sa kawalan ng mailalaman sa kumakalam na tiyan. Hindi maiwasan ng mag-asawa na magdamdam sa liderato ng bansa gayung ibinigay ang hinihingi ng may kailangan. At tulad sa pelikula, blockbuster sa takilya este sa COMELEC sa dami ng botong tinanggap mula sa mga tangang naniniwala sa pangako ng lilo.

Karagdagan, maghanda at huwag magulat Mang Juan at Aling Marya dahil may nakaambang balaraw na muling itatarak sa kabuhayang naghihingalo sa susunod na mga araw. Tataas ang singilin sa mga “utilities”, tulad ng kuryente, tubig at gasolina’y na ihahain sa hapag ano mang araw mula ngayon. At pagkatapos ihain ang pagtaas ng mga buwanan ng gastusin, ilalatag ang karagdagang pamasahe sa MRT na magpapawis sa mga obrerong problema ang pamasahe. Habang sa loob ng pinaglilingkurang opisina, asahan ang pagbaba ng iuuwing pera sa araw ng sahod dahil ipapatupad ang pagtaas ng premium ng PHILHEALTH at kontribusyon sa Pag-Ibig. Sa pagtaas ng mga gastusin, pasanin ‘di na sa balikat kundi sa buhay ang mga nabangit sa ibabaw na tunay na paglubog sa kalagayan ng karaniwang tao.

Sa totoo lang, walang palad ang bayan sa uri ng lideratong inihalal ng bayan o maging sa mga itinalaga. Sa pagkakatalaga sa bagong kalihim ng DOF, Mang Juan umasa sa darating na delubyo dahil batikan ito sa mga pahirap na batas na magpapagana kuno sa ekonomiya ng bansa. Binanggit ang pag-igting sa pangonglekta ng buwis upang mapondohan kuno ang mga balaking programa ng pamahalaan. Ngunit, malayong madama ng karaniwang tao dahil uunahin ang pagsipa ng negosyo na kapakinabangan kuno ng bayan. Sa pag-upo ng bagong kalihim, puro papogi ang kilos ngunit ‘di narinig ng pagtutol sa mga nagaganap na pagtaas ng bayarin ng sambayanan. Ang paglago ng negosyo ang batayan ng mga ekonomista ng bansa at walang pagtutol subalit mainam o malinaw na sukatan ang ang kababaan ng halaga ng bilihin. Sa dahilang ito ang abot at dama ng karaniwang tao na ibig paglingkuran ng nasa pamahalaan. Para saan ang kaunlaran na iilan ang nakikinabang?

Sa pagsisiguro na maabot ng mamamayan ang halaga ng mga bilihin at bayarin, matitiyak ang magandang pagtanggap ng bayan sa pag-unlad na ibig ng panguluhan. Ang nakangiting si Mang Juan ang indikasyon na lumalago ang ekonomiya ng bansa. Subalit ang mataas na halaga ng bayari’t bilihin sa kasalukuyan ang larawan na napabayaan ang ekonomiya ng bansa at ng sambayanan. Huwag itago sa mga estatistika ang huwad at masaganang kabuhayan sa bansa dahil alumpihit ang bayan sa pinagkukunan sa bayaring parang langit. Ang damang malagong ekonomiya ng bansa’y makikita sa uri ng pagkain na sa mesa.

Maraming Salamat po!!!