PSA: Hindi ipinanganak, walang ikinasal at walang namatay…‘MULTO’ SI ‘MARY GRACE PIATTOS’

KINUMPIRMA ng Philippine Statistics Authority (PSA) mula sa Civil Registry System (CRS) database na walang nakatalang Certificate of Live Birth (COLB), Certificate of Marriage (COM), at Certificate of Death (COD) na pangalang “Mary Grace Piattos”.

Ito’y matapos sabihin ng isang opisyal mula Office of the Vice President (OVP) noong November 25, na mayroong pangalang “Piattos” sa Davao City—dahilan para muling hanapin ang misteryosong indibidwal na si “Mary Grace Piattos”.

Ito ay nag-ugat nang tanungin ni Batangas 2nd district Representative Gerville “Jinky Bitrics” Luistro si Gina Acosta, ang special disbursing officer ng OVP, kung personal niyang kilala si Mary Grace Piattos— na pumirma sa acknowledgement receipt para sa confidential funds na isinumite ng OVP.

Si “Mary Grace Piattos” ay maraming pinirmahang acknowledgement receipts na isinumite ng Office of the Vice President bilang paliwanag sa paggamit ng confidential funds ni VP Duterte noong 2022.