Lighting ng Jones Bridge pinangunahan nina PBBM, FLLAM at Mayor Honey

SINAMAHAN ni Manila Mayor Honey Lacuna ang First Couple na sina President Ferdinand Marcos, Jr. at First Lady Liza Araneta Marcos upang pangunahan ang pagpapailaw ng Jones Bridge nitong Sabado ng gabi, June 7, 2025.

Ang okasyon ay minarkahan din ng ika-50 taong anibersaryo ng bilateral relations sa pagitan ng Pilipinas at People’s Republic of China (PROC).

Naroon din sa nasabing pagtitipon na ginanap sa Pasig River Esplanade, sina Presidential adviser for Pasig River Development Secretary Jerry Acuzar, Chinese Ambassador to the Philippines Huang Xilian at mga kinatawan mula sa Filipino-Chinese business sector.

Sinamahan ng nga nabanggit ang First Couple, hindi lang sa ceremonial lighting ng makasaysayang tulay, kundi maging sa panonood ng musical fireworks display.

Ang diplomatikong relasyon sa pagitan ng Pilipinas at China ay itinatag noong June 1975.

Simula noon, ang dalawang bansa ay nakagawa na ng halos 100 bilateral agreements na sumasakop sa mas malawak na larangan kabilang ang political, defense, trade and investments, judicial cooperation, infrastructure development, energy cooperation, air services, cooperation para labanan ang transnational crimes, consular cooperation, tourism and culture at iba pa. (ANDI GARCIA)