MAYOR SA PAMPANGA TIMBOG SA KOTONG!

ARESTADO sa entrapment operation ng mga operatiba ng National Bureau of Investigation (NBI) ang alkalde ng San Simon, Pampanga dahil sa pangingikil sa isang kompanya Martes ng hapon sa isang restoran sa Clark.

Ang naaresto ay si San Simon Mayor Abundio “JP” Punsalan Jr., na isinalang nitong Miyerkoles ng umaga sa inquest proceedings.

Nabatid na isinagawa ang operasyon 6:15 ng hapon na pinamunuan ni Assistant NBI Director Noel C. Bocaling katuwang ang Technical Intelligence Division, Counter-Terrorism Division, Criminal Intelligence Division, Counter-Intelligence Division, Intelligence Research & Analysis Division, at Pampanga District Office.

Inaresto ang alkalde kasama si Dr. Ed Ryan Dimla alyas “Doc Yang” sa aktong pagtanggap ng umano’y suhol kapalit ng paborableng resolusyon mula sa lokal na pa-mahalaan.

Base sa reklamong inihain ng Real Steel Corporation, humingi umano si Mayor Punsalan ng P80 milyong suhol, subali’t P30 milyon lamang ang paunang binigay at ang nalalabing P50 milyon ay hulugan.

Nahaharap sina Mayor Punsalan at si Dimla sa kasong paglabag sa Republic Act 3019, Anti-Graft and Corrupt Practices Act, at iba pang kaugnay na penal law.

Dinakip rin ng NBI-IS ang mga security personnel ng alkalde nang mahulihan ng ilang baril.(Thony D. Arcenal)