UMAASTANG MAGALING
Advertisers
Kapal ng mukha ang ipinamalas ng mga bugok na mambabatas sa pagnanais na ilagay sa baul at tuwirang ibaon sa limot ang inihaing pagpapasipa kay Inday Gala. Hindi binigyan galang ang titik ng saligang batas at ibig tuldukan ang usapin sa pasyang inilabas ng kataas-taasang hukuman (KH) na ‘di ayon sa saligang batas ang impeachment na iniharap laban sa abalang pangulo, teknikalidad na dahilan. Pasyang ‘di sinasang-ayunan ng maraming Pinoy, mga “legal expert” maging ng mga dating punong mahistrado na dahilan ng pagsasampa ng MR (Motion for Recon). Ngunit o tila mababalewala ang galawan sa inilabas resolusyon na ilagay sa baul ang usapin ni Inday Gala gayung ‘di nasilip ang laman ng inihain na reklamo. Sa galaw ng bugok na kapulungan, iisa ang iisipin o iniisip, ibig palabasin na higit na mataas ang KH sa hapag na pinaghainan at maging sa hapag ng malawak na kapulungan. Ang siste, ‘di nakitaan ng paggalang sa kabilang kapulungan.
Sa totoo lang, nakakaloka ang dahilan ng mga bugok na nagsasaad ng paninindigan sa pagsunod sa utos na nakasaad sa hatol ng KH. Gayung may inihain na MR upang pagpasyahan ng KH at ‘di mabalewala ang inihain na reklamo na nasa harap ng bugok na kapulungan. Ang pagsasaad ng pagsunod sa kautusan ng KH na ayon sa batas ang pasya’y ang salang tindig na nagpapakita ng pagkiling sa hinainan ng reklamo at pagpabalewala sa proseso ng saligang batas. Sa mga naglabasang pahayag at opinyon mula sa mga eksperto, mali ang tindig ng bugok na kapulungan higit ni Keso na bulag na tagataguyod ni Inday Gala. Nasa maling lugar sa kasaysayan ang asawa ni Puso.
Ang kaganapan sa bugok na kapulungan ang higit na nagpa-alab sa damdamin ng taong bayan na ibig mabatid ang salang gawa ng abalang pangulo. Ang inilabas na pasya ng KH ang dahilan na ginamit ng mga bugok upang itabi ang usapin ngunit ‘di maibasura dahil ‘di ginalawan ang reklamong inihain. Saan o anong rason ang magpapalaya o magpapatahimik sa kaisipan ng tao o maging ni Inday Gala kung hindi naganap ang dapat na pagdinig. Sa totoo lang, ibinitin ng mga bugok ang ibig ng Pinoy maging si Inday Gala sa maling pasya na ‘di dinggin ang usaping nasa harap. Ang masakit patuloy na hahabulin ng konsensiya ni Inday Gala kung meron na malinis ang pangalan. At ang higit na masakit, natiyak ng bayan na ang mga nahalal sa bugok na kapulungan ay panay pansarili ang lakad at ‘di para sa bayan.
Huwag mag-alala ang 17 bugok, ‘di kayo makakaiwas sa balik na inyong gawa. Hindi natatapos ang usapin sa inyong harapan sa pagkamulat ng bayan. At umasa na marami ang maglalapit sa tao sa laylayan at ipapaalam ang salang gawa ng bugok na kapulungan. Ang kaganapan sa kasalukuya’y kahalintulad sa kaganapan na ibig pagtakpan ng mga dating senador ang sobre ni Jose Pidal na daan sa paglabas ng usapin sa hapag ng dating senado tungo sa kakalsadahan. Ang kahalintulad na kaganapan ang mitsa na dapat katakutan dahil ‘di lang si Inday Gala ang naka salang, maging ang mga ulo ng mga bugok na nagtatakip sa salang gawa.
Sa totoo lang, silip ni Mang Juan sa mga talumpati na gumagamit ng mabulaklak na linya ngunit dama ang pag-aabogado sa nasasakdal. Ang pagmamagaling ng iilan sa batas ngunit kulang sa moralidad ang salang tindig na ‘di binalikan sa nakaraan. Sa totoo pa rin, nakakagalit ang tindig ng isang mambabatas na inililiko ang tama ngunit silip ang kamalian na nagpatingkad sa dating alang kinang ngunit ngayo’y ginto dahil sa tamang tindig.
Sa pagmamatyag kapansin pasin na umaastang magagaling ang mga bugok gayung ‘di mahukay ang tamang pagpapaliwanag sa salang gawa. Paano maipapaliwanag ang agad-agad na umabot sa anim na buwan at naghahain ng usapin sa KH. At heto, ‘di man lang nasilip ang laman ng reklamo laban sa abalang pangulo ngunit ibig ibasura sa dahilan ng kautusan ng KH. Dahil ‘di maipabasura o’ sige ilagay sa baul at hayaang matulog. Maliwanag pa sa sikat ng araw ang pagtatakip sa usapin ni Inday Gala at kawalan ng tamang tindig para sa bayan. Tunay na walang saysay sa mga bugok ang usapin ng bayan o ng mamamayan higit salapi ang nangungusap. At may tanong, ano ang kapalit sa galawang pagtatakip sa salang gawa ni Inda Gala mula ngayon hangang sa ‘28?
Muli, silip ang astang magagaling ngunit pansin ang kawalang laman ng banggit. Ang kagalingan, naging laman ng maraming mensahe sa pagtatapos ng kawalang natutunan sa pamantasang pinanggalingan. Ang pagdadala sa sarili sa harap ng bayan ang galaw na nasilip ng marami higit sa lider na nanumpa na itataguyod ang kagalingan ng bayan. Ang pagdadala sa ibig ng bayan ng walang pag-iimbot at ng buong katapatan ang kagalingang inaasam sa sino mang nanumpa na magsisilbi sa bayan. Ang katapatan na ‘di masisilaw sa kinang salapi at makahaharap sa ano mang hamon ng may dignidad at ‘di pumipikit – pikit ang tanging inaasahan sa isang opisyal. Ang pag-ayon sa maling tindig ang naglayo sa pangarap sa kinabukasan.
Ang nag-astang magaling karaniwan sa putikan ang dating dahil nakalimot sa kagalingan ng kalooban at inuna ang layaw ng katawan. Sa pagsisikap mararating ang pangarap ngunit ang tumindig kasama ang may sala dahil sa kaperahan ang salang tindig na pagsisihan sa kinabukasan. Ang paglimot sa nakaraan ang ‘di inaasahan sa isang mambabatas na madalas na naduhagi sa mga pasya sa nakaraan. Ang ‘nalimutang pagninilay sa nakaraan dahil nabulag sa kapangyarihan at ang umaasa sa pangako ng tampalasan ang maling galawan ng mga taong nag-aastang magaling ngunit hungkag sa kabuuan.
Maraming Salamat po!!!!