ESCUDERO OUT, SOTTO BAGONG SENATE PREXY

PINALITAN ni Senador Vicente “Tito” Sotto si Sen. Francis “Chiz” Escudero sa pagka-Senate President.

Sa sesyon kahapon, nag-mosyon si Sen. Juan Miguel “Migz” Zubiri na ideklarang bakante ang posisyon ng Senate president. Dahil walang kumontra, inaprubahan ito ni Escudero na namuno pa sa sesyon.

Kasunod nito, ninomina ni Zubiri si Sotto na gawing Senate president na inilarawan niyang “leader of great integrity.” Sinegundahan naman ni Sen. Loren Legarda, ang nominasyon, at walang tumutol.

“With Senator Sotto as senate president, the Senate is in good hands,” wika Zubiri.

Inaprubahan naman ni Senate President Pro Tempore Jinggoy Estrada ang naturang mosyon, at walang tumutol na naging daan upang opisyal na italaga si Sotto na bagong lider ng Senado.

Una rito, sinabi ni Sotto na mayroong 15 senador ang sumuporta na magkaroon ng pagbabago sa liderato ng Senado.

Si Senador Panfilo “Ping” Lacson naman ay nahalal bilang bagong Senate President Pro Tempore, kapalit ni Estrada.

Hinirang din si Zubiri bilang bagong Senate Majority Leader, kapalit ni Senator Joel Villanueva.

Matatandaang nitong nakaraang Hulyo 28, nang mahalal muli si Escudero na Senate president, habang napili namang Minority leader si Sotto.

Nagpasalamat naman si Escudero sa mga nakasama at katuwang mula 19th Congress. (Mylene Alfonso)