NAGBIGAY DAAN

Naulinigan ang isang magandang balita na isasantabi ng alkalde ng Naga City na si Leni Robredo ang pagtutulak ng mga panatiko o taga-udyok na tumakbo sa panguluhan sa ’28, sa halip tatakbo bilang re-electionist sa banggit na lunsod. Sa banggit na balita, umaasa na magkakaisa ang grupong demokratiko at magbabalangkas ng iisang lapian na haharap o lalaban sa kandidato ng pamahalaan at ng grupo ng mangmang ng kaTimugan. Ganap na ‘di madali na pagkaisahin ang grupong demokratiko sa dahilang paniniwala sa usapin, tugon at sa paglutas sa isyu sa lipunan. Ang pagkakaiba sa pananaw at pamamaraan ng pagharap sa mga usapin ang may katagalan ng pinag-uusapan at ang dahilan sa ‘di pagkakaisa. Sa tindig na may magbibigay daan upang magkaroon ng iisang tatakbo sa panguluhan sa ’28, napapanahong mag-usap at magkaisa ang demokratikong pwersa para sa iisang lapian na magdadala ng ganap na pagbabago para sa bansa.

Sa pagbabalik tanaw, napansin ang pagkakahawig ng pagkakataon na nagkakaron ng espasyo na magkaisa ang mga pwersa ng demoratikong na tumakbo sa iisang lapian. Ang espasyong minsan nasubukan at napagwagian ngunit ‘di nagtagal dahil sa pagkakaiba sa punto ng ibig na programa at pagpapatupad, nagkahiwalay. Ang pagkakaisa ang dahilan na dapat maganap sa kasalukuyan ng masiguro na walang puwang ang mga sakim na muling makabalik o makaupo bilang tagapagpaganap sa bansa. Ang salang pag-upo sa nakaraan ng mga sakim at mga mangmang bilang punong tagapagpaganap sa pamahalaan ang sapat na dahilan upang magkaisa ang bayan higit ang pwersang demokratiko ng maiwasan ang mapagmalabis ‘di lang sa salaping bayan maging ang walang habas na pagpatay sa mga inosenteng kababayan ng salang programa laban sa droga.

Mahaba ang usapin ng pagkakaisa subalit ang unang hakbang ang mahalaga dahil dito makikita ang sinseridad ng bawat panig o bawat isa na ibig ng ganap na pagsulong ng pagbabago sa bansa. Sa kasalukuyan mapapansin ang ilang politiko karapat dapat na maging kinatawan ng bayan o napipisil na maging panlaban o pantapat na malaki ang pag-asa na magwagi sa halalan sa ’28, at ito’y si Risa Hontiveros. Nagpakita si Sen. Hontiveros ng kagalingan sa kasalukuyang pwestong tangan at walang bahid na maibabato ang mga magiging katunggali. Sa pagsusuri at pag-alam sa mga nakaraan ng senadora, malinis ang ngalan nito at ang mga pinupukol na isyu ay pawang pinabulaan ng Commission on Audit (COA) sa ulat na isinumite. Makikita ang ulat sa mismong website ng COA na walang nagawang pagmamalabis sa pondo ng PHILHEALTH o kurapsyon ang butihing senadora.

Sa kabilang banda at sa ngalan ng patas na pananaw, nasilip ang tapang ni Risa Hotiveros sa pagharap sa mga usapin higit sa panahon na inuusisa ng senado ang usapin ng droga at ang mga salang gawa ng dating pangulo na kasalukuyang naghihimas ng rehas sa The Hague. Hindi nakitaan ng pagkiling sa mali ang senadora at dala ang patas na pagsusuri sa usapin na isang magandang katangian sa magiging puno ng bansa. Sa totoo lang, matapang ang tindig ng senadora higit sa usapin sa West Philippine Sea (WPS) at ang paggalang sa mga karapatang pantao na ‘di nakita sa dati at kasalukuyang lider ng bansa. Walang kulay ang paglalahad at nakabatay ang banggit sa mga nagaganap o naganap na tinayuan ng senadora ng walang pag-aalinlangan. Ang tindig na nakakuha ng paghanga ‘di lang ng Batingaw maging sa maraming pwersang demokratiko na nagpatibay sa paniniwalang ‘di bibitaw sa usapin sa buhay ng tao si Risa Hontiveros. At ang tindig na kailangan sa isang namumuno, higit ang sa kagalingan ng nakakaraming Pinoy.

Sa kabilang banda, may paghanga sa alkalde ng Lunsod ng Naga sa pagnanais na pagkaisahin ang pwersang demokratiko sa tindig na magbigay daan o ‘di humabol sa panguluhan sa ’28. Ang tindig na dapat isa alang – alang ng mga nagtutulak sa alkalde ng Naga na tumakbo sa panguluhan. Batid na malayo pa ang usapin ng halalan sa ’28, subalit mainam na nakita ng alkalde na sa pagkakaisa ng pwersang demokratiko ang tanging paraan upang mapagwagian ang panguluhan sa ’28. Ang magsulong ng iisang kandidato sa panguluhan ang tindig na pinanday at napagnilayan mula sa nakaraan na dahilan na magbigay daan sa karapat dapat sa ‘28. Ang karanasan sa nakaraan ang guro na nagturo sa alkalde na ‘di napapanahon na magkawatak watak ang bayan dahil sa layon ng iilan na makaupo at makopo ang kapangyarihan ng pamahalaan. At ang paghanga na inuusal sa tindig na tatayuan ng alkalde ng Lunsod ng Naga.

Sa pagbibigay daan ng alkalde, walang duda na makakamit ang ibig sa ’28 higit ang maisulong ang kagalingan ng bayan at mamamayan sa pamumuno ni Risa Hontiveros. Sa totoo lang, ang pagtutulak sa panguluhan kay RH ay base sa tindig na ipinamalas higit sa paghahanap ng katotohanan sa mga anomalya’t pagmamalabis na naganap sa dating pamahalaan. Pamahalaan na ‘di nakitaan nang pagkalinga sa bayan at purong retorika ang pagpapatakbo sa bansa at kagalingan pansarili ang inuna. Sa liderato ng kamangmangan, ang bansa’y nangulelat sa kaunlaran habang ang pamilya’y masigabo ang kabuhayan. Bangkarote ang kabang bayan, lumobo ang pagkakautang at bayarin na ipinatong sa balikat ni Mang Juan. Muli, at ibig bigyan diin na ang utang ng bansa sa panahon ni Totoy Oblo ay lumobo ng higit na P6T at ang trilyon-trilyong halaga ang naidagdag sa panahon ni Jun Singhot.

Sa totoo lang, masisiyahan ang bayan na pagbibigay daan ni Leni sa ’28, at dahilan na magkakaisa ang pwersa ng demokratiko upang isulong sa panguluhan si Risa Hontiveros. Ang pagkakaisa na isulong ang nais na pag-unlad at inisantabi ang mga sulsol ang tindig na nagbigay pugay sa alkalde bilang ganap na makabayan. Bilang panghuli, walang kulay na bitbit o dala ay higit walang pasanin ng katiwalian ang isang Risa Hontiveros. Walang utang na loob ang senadora sa sino mang negosyante o grupo na maaring puhunanin sa susunod ng panahon. Ganap na serbisyo ang isusulong sa bayan ng walang pag-iimbot at ng buong katapatan. Sa pagbibigay daan ng Alkalde ng Naga, malinaw ang tahakin ang magkaisa ang bayan at dalahin si Risa Hontivers sa ‘28.

Maraming Salamat po!!!!