P40.8-MILYON HALAGA NG SHABU NA NAKATAGO SA ‘WOODEN BOOKS’ NAHULI SA PASAHERO NG NAIA 3

NAHULI ng Bureau of Customs – Ninoy Aquino International Airport (BOC-NAIA), sa pakikipagtulungan ng Philippine Drug Enforcement Agency (PDEA) at ng NAIA Inter-Agency Drug Interdiction Task Group (NAIA-IADITG), ang isang pasaherong natagpuang may dalang ilegal na droga sa NAIA Terminal 3 noong Pebrero 15, 2026.

Sa ulat ng pulisya, ang dala-dalang bagahe ng pasaherong South African ay isinailalim sa X-ray screening kung saan nakita sa tv monitor ang kahinahinalang hugis na nakatago sa dala nitong libro.

Agad na nagsagawa ng 100% physical examination na nagresulta sa positibong indikasyon ng ilegal na droga at kinumpirma ng karagdagang pagsusuri na ang puting mala-kristal na substansiya na nakatago sa loob ng mga improvised wooden books, na nakabalot sa plastik at carbon paper, ay positibo sa methamphetamine hydrochloride, na karaniwang kilala bilang shabu.

Ang nakumpiskang substance ay may bigat na humigit-kumulang 6,000 gramo, na may tinatayang karaniwang halaga na P40,800,000.

Binigyang-diin ni BOC Commissioner Ariel F. Nepomuceno ang pinaigting na pagsisikap ng ahensya sa pagkontrol sa hangganan ay alinsunod sa direktiba ni Pangulong Ferdinand R. Marcos Jr. na palakasin ang pagpapatupad at pangalagaan ang mga komunidad mula sa ilegal na droga.

Ang BOC-NAIA, sa ilalim ng pamumuno ni District Collector Atty. Maria Yasmin O. Mapa, ay patuloy na nagpapalakas ng mga hakbang sa inspeksyon at pagpapatupad nito sa malapit na koordinasyon sa mga partner agencies upang matiyak na ang mga pasilidad ng paliparan ay hindi sinasamantala para sa pagpupuslit ng mga ilegal na droga at iba pang mga ipinagbabawal na gamit.

Ang mga nakumpiskang gamit at ang pasahero ay agad na dinala sa PDEA para sa wastong kustodiya at karagdagang imbestigasyon. (JOJO SADIWA/JERRY TAN)