Katotohanan sa pagkaantala ng pensyon ng BJMP retirees

Pensyonado na rin tayo…at marahil kapag darating ang araw na maantala rin ang pagpapadala ng benepisyo sa ATM, malamang ay magagalit din tayo lalo na kung inaasahan ito para sa “maintenance” – tulad ng pakiramdam ngayon ng mga retirado mula sa Bureau of Jail Management and Penology (BJMP) dahil sa pagkaantala ng kanilang pensyon.

Sa ganitong pagkakataon, ang BJMP ang madalas na nagiging “shock absorber” ng galit at reklamo – para bang nagiging kontrabida ngunit ang katotohanan, biktima rin ng mabagal na sistema ng pambansang pondo.

Hindi naman lingid sa kaalaman ng mga retirado, na nasa kamay ng Department of Budget Management (DBM) ang bola at wala ito sa BJMP. Alalahanin, pambansang pondo ang pinag-uusapan dito.

Bukod dito, hindi rin lingid sa kaalaman ng ating mga retirado, na ang BJMP lamang ang siyang ay taga-proseso ng payroll.

Iniulat na kumpleto at pasok sa deadline ang lahat ng dokumentong isumite ng BJMP at ang tanging hinihintay na lang para magkaroon ng laman ang mga account ng mga pensioners ay ang go-signal mula sa DBM. Iyon naman pala e, ang linaw – walang sala ang BJMP sa pagkakaantala. Malinaw na ang kawalan ng Special Allotment Release Order (SARO) at Notice of Cash Allocation (NCA) ay hindi kasalanan ng pamunuan ng jail bureau. Hindi sila maaaring maglabas ng perang wala pa sa kanilang kustodiya.

Sa madaling salita, ang BJMP ay parang isang kartero na handa nang ihatid ang sulat, pero hindi pa ito ibinibigay ng sentral na opisina sa kanila.

Kung inakala na ang pagkaantala ay dahil sa isyu ng kapabayaan isa itong maling akala dahil hindi kinakalimutan ng BJMP ang kanilang mga “beterano” tulad ng opisyal na inulat na kompleto at pasok naman sa deadline ang ahensya sa pagsumite ng dokumento. Malinaw na patunay ito na hindi kinalimutan ng BJMP ang kanilang mga “beterano.”

Sa katunayan, ang kanilang panawagan na huwag mabahala ay nakabatay sa katotohanang “technically ready” na ang kawanihan. Nakahanda na ang listahan, nakahanda na ang sistema ng crediting, at nakatutok ang kanilang mga finance officers.

Ang pagkaantalang ito ay hindi dahil sa nakatambak na papel sa mesa ng BJMP. Ito ay dahil sa masalimuot na proseso ng pagpapalabas ng pambansang pondo (national funds) na kontrolado ng mas mataas na sangay ng gobyerno. Hindi ito kapabayaan sa halip, ito ay usapin ng pambansang daloy ng kapital na sa kasamaang palad ay naantala sa pagkakataong ito.

Malinaw ang mensahe – ang BJMP ay kasangga ninyo, hindi kalaban. Ang kanilang pangako ay malinaw na oras na ‘lumapag’ ang pera mula sa DBM, diretso ito sa inyong bulsa o ATM kaya kaunting haba lang daw ng pasensya.

Linawin natin, ang pakiusap ng BJMP na pahabain ang pasensya ay hindi inig sabihin na pag-iwas sa responsibilidad kung hindi, to ay isang tapat na pag-amin sa sitwasyon at pagtiyak na ginagawa nila ang lahat para mapabilis ang proseso. Kasyas huwag daw mabahala dahil ang inyong mga benepisyo ay hindi mawawala sapagkat ito ay pinagtrabahuhan ninyo ng buong buhay.

Pangako ng BJMP na sa sandaling “mag-go” ang DBM, asahan ang mabilis na crediting mula sa kawanihan. Sa puntong ito, ang kailangan ay hindi galit, kundi pag-unawa na ang inyong inang ahensya ay ginagawa ang lahat para maibigay ang nararapat sa inyo sa lalong madaling panahon.