Sapat na reserbang langis, tiniyak ng Marcos admin

MAY sapat pang reserbang langis ang Pilipinas para tugunan ang pangangailangan ng bansa sa loob ng susunod na 39 na araw.

Sinabi ni Palace Press Officer Usec. Claire Castro na ito ang iniulat ng Department of Energy (DOE) kay Pangulong Ferdinand Marcos Jr. sa isinagawang pulong sa Malacañang noong nakaraang Martes.

Batay sa ulat na inilahad ng DOE, umaabot pa sa 46 na araw ang oil reserves ng bansa hanggang noong Mayo 29.

Kung pagbabatayan ang naturang datos, tinatayang nasa 39 na araw pa ang natitirang suplay ng langis ng bansa hanggang ngayong Hunyo 5.

Ipinapakita nito na may nakahandang reserbang langis ang Pilipinas na maaaring magamit upang matugunan ang pangangailangan ng bansa sa loob ng mahigit isang buwan sakaling magkaroon ng pagkagambala sa suplay.

Samantala, sinabi rin ni Castro na malawakan ang naging talakayan sa pagitan ng Pangulo at ng DOE, kung saan kabilang sa mga napag-usapan ang kalagayan ng power supply at grid conditions sa Luzon at Visayas. (Gilbert Perdez/Vanz Fernandez)