BOC CEBU CHIEF NAHAHARAP SA KASONG GRAFT SA OMBUDSMAN

NAHAHARAP sa mga kasong kriminal at administratibo sa Office of the Ombudsman si Bureau of Customs-Port of Cebu District Collector Alexandra Yap-Lumontad dahil sa alegasyon ng iregularidad sa sa gawaan ng sigarilyo sa Mactan Export Processing Zone (MEPZ).

Natanggap ng Office of the Ombudsman ang reklamo noong April 29 kung saan kabilang sa mga isinampang reklamo laban kay Lumontad ay may kaugnayan sa falsified o forged official seals o stamps on clearance documents at falsification ng commercial documents.

Ang nasabing mga aktibidad ay paglabag sa Revised Penal Code (RPC) Articles 161 (forgery of the seal of the government), 171 (falsification by a public officer), at 172 (falsification by a private individual and use of falsified documents).

Maaari ding managot ang opisyal sa kasong paglabag sa Republic Act 10863 o Customs Modernization and Tariff Act (CMTA) Sections 1401 (unlawful importation or exportation) at 1424 (export misdeclaration).

Maliban dito, nahaharap din ang opisyal sa kasong administratibo at paglabag sa Republic Act 3019 o Anti-Graft and Corrupt Practices Act at Republic Act 6713 o Code of Conduct and Ethical Standards for Public Officials).

Inirekomenda sa reklamo na magsagawa ng preliminary investigation laban sa kaso para matukoy ang pagkakasangkot ng District Collector.

Hiniling din ng mga stakeholder mula sa BOC Cebu na patawan ng preventive suspension si Lumontad para hindi maapektuhan ang imbestigasyon.

Nanawagan din sila sa Bureau of Internal Revenue (BIR) na beripikahin ang authenticity ng “sin tax” stamps na sangkot sa kaso.

Si Lumontad ay nailipat sa Port of Cebu noong November 2025 matapos iutos ni BOC Commissioner Ariel Nepomuceno ang balasahan sa kanilang mga tauhan bilang bahagi ng kampanya laban sa smuggling at korapsyon sa ahensya.

Bago mapunta sa Cebu ay naging district collector din siya sa Ninoy Aquino International Airport (NAIA), Port of Cagayan de Oro, at Port of Clark.