Pre-trial order para sa impeachment case vs VP Sara ilalabas sa June 29

INAASAHANG ilalabas ng Senate Impeachment Court sa Lunes, June 29, ang pre-trial order kaugnay ng impeachment case laban kay Vice President Sara Duterte.

Ayon kay Senate Secretary at Impeachment Court Clerk Renato Bantug Jr., kasalukuyan nang binubuo ang dokumento matapos makumpleto ang limang araw na pre-trial conference.

Ayon kay Secretary Bantug, naglabas na rin ng advisory memorandum si Senate President Sherwin Gatchalian sa mga senador hinggil sa planong pagpapalabas ng pre-trial order sa Lunes.

Magtatrabaho rin, aniya, ang mga kawani ng Senado kahit sa weekends upang matapos at maipalabas sa itinakdang araw ang naturang kautusan.

Ang pre-trial order ang magsisilbing gabay sa pagdinig ng impeachment trial.

Nakapaloob din dito ang napagkasunduang mga isyu, mga testigo, mga ebidensiya, at schedule ng paglilitis batay sa mga posisyon ng House prosecution panel at ng kampo ni VP Duterte.